Bildiyimiz kimi, milyonlarla kompüter istifadəçisi Windows əməliyyat sistemindən istifadə edir. Xüsusilə son dövrlərdə edilən təkmilləşdirmələrdən və məhdudiyyətlərdən sonra əksər istifadəçilər Windows 11 sisteminə yönəlmişdi. Lakin, indi Windows 11 istifadəçiləri bildirir ki, Microsoft kilid ekranında belə öz məhsulunu reklam edir. Belə ki, şirkətin öz məhsullarını tanıtmaq üçün etdiyi ümidsiz cəhdlər Windows istifadəçilərinin tənqidinə səbəb olub.
Ümumiyyətlə, Microsoft son dövrlərdə süni intellektin təkmilləşdirilməsinə milyardlarla dollar sərmayə qoyub. Xüsusilə Microsoft ChatGPT, Copilot kimi köməkçilərin əsasını təşkil edən GPT-4 dil modelinə yüklü miqdarlarda sərmayə qoyub. Microsoft, yalnız bazara yenilikçi məhsullar gətirməyə deyil, həm də müştərilər arasında populyarlığını təmin etməyə çalışır. Bu çərçivədə, Windows istifadəçiləri bildirir ki, Microsoft kilid ekranında QR kod əlavə edərək öz məhsulunu reklam edir. Qeyd edək ki, texnologiya nəhənginin belə ümidsiz bir reklam üsuluna əl atması istifadəçilər tərəfindən heç də birmənalı qarşılanmayıb.
Microsoft istifadəçiləri əlavə etdiyi QR kod ilə birbaşa olaraq Copilot veb saytına yönləndirməyə çalışır. Şirkətin bu hərəkəti isə istifadəçilər arasında böyük mübahisələrə və tənqidlərə səbəb olub. Microsoft bundan sonra açıqlama verərək, sadəcə Copilotin varlığını xatırlatmaq məqsədi ilə belə bir addım atdıqlarını bildirib. Onu da qeyd edək ki, QR kod sözün əsl mənasında şəkil faylına daxil edilmişdir. Bununla belə çoxsaylı tənqid atəşinə tutulan şirkət bu açıqlamadan sonra istifadə etdiyi metoddan əl çəkdi. Maraqlısı budur ki, internetdə Microsoft-un yenidən xüsusi pankartlardan istifadə edərək Chrome istifadəçilərini hədəf aldığı barədə məlumatlar var. Bu dəfə “Chrome-da GPT-4 ilə pulsuz söhbət” şüarı ilə reklam edirlər.
