Ötən həftə dünyanın ikinci ən böyük kriptovalyuta birjası olan FTX birjası iflasını elan etmişdi. İndi isə bir qrup haker tərəfindən birjadan 600 milyon dəyərində kriptovalyuta oğurlanıb. Belə ki, hakerlər Ethereum, Solana və Binance Smart Chain tokenlərini rəsmi birja hesablarından mərkəzləşdirilməmiş kriptovalyuta birja ünvanlarına köçürüblər. Qeyd edək ki, ötən günlərdə şirkətin 30 yaşlı qurucusu və baş direktoru Sem Bankman-Frid bütün məsuliyyəti öz üzərinə götürərək istefa verdiyini açıqlamışdı. Bu açıqlamadan sonra isə birjada böyük satış dalğası yaşanmışdı.
Ötən gün gecə saatlarında iflas etmiş birjada baş verən aktiv köçürmələr istifadəçilərin diqqətini cəlb edib. Belə ki, birjada olan kriptovalyutalar xarici pul kisələrinə köçürülürdü. Bundan xəbər tutan FTX şirkəti birjadan kriptovalyutaların çıxarılmasını dayandırıb və bir neçə saat sonra Telegram hesabından açıqlama verərək şirkətin hekləndiyini, həmçinin 600 milyon dollar kriptovalyutanın oğurlandığını elan edib. Şirkət güman edir ki, həm FTX.com, həm də FTX US saytları heklənib. Ən pisi odur ki, bu birjada bir çox müxtəlif müəssisələrin aktivləri saxlanılırdı, aktivlərin oğurlanması ilə birlikdə bir neçə müəssisə də iflasını elan edə bilər.
Şirkətin yeni CEO-u olan John J.Ray bu məsələ ilə bağlı ciddi araşdırmaların aparılacağını qeyd edib. Həmçinin o istifadəçilərin birjanın saytına daxil olmamasını məsləhət görüb. Çünki birjanın saytında hələ də viruslar ola bilər. Qeyd edək ki, dünyanın ikinci ən böyük kriptovalyuta birjasının iflas etmə səbəbi likvidlik probleminin baş verməsidir. Digər bir ehtimal isə onsuzda çökməkdə olan birjadan şirkətin keçmiş baş direktorunun heklənmə adı ilə kriptavulyutaları çıxarmasıdır. Yəni iddialara görə FTX şirkətinin heklənməsi, əslində bəzi proseslər üçün pərdə rolunu oynamış ola bilər.
