Texnologiya sahəsi inkişaf etdikcə elm adamları insanların həyatını asanlaşdırmağa davam edir. Belə ki, Augmental startapının mütəxəssisləri əlillərin kompüter və smartfonları idarə edə bilməsi üçün yeni MouthPad texnologiyasını hazırlayıb. Augmental startapı 2019-cu ildə bir qrup MIT məzunu tərəfindən qurulub. Noutbuklarda rast gəldiyimiz siçan ilə eyni funksiyanı yerinə yetirəcək yeni texnologiya inqilabi yenilik də hesab oluna bilər. San-Fransiskoda yaranan Augmental startapının yeni texnologiyası ağıza taxılır və dilin hərəkətlərinə uyğun funksiyalar yerinə yetirir. Məhz bu texnologiya ilə kursoru istənilən formada hərəkət etdirmək, klikləmək mümkündür.
Yeni MouthPad texnologiyasının işləmə prinsipi necədir?
Qeyd etdik ki, yeni MoutPad texnologiyası ağıza taxılır və dilin hərəkətinə uyğun olaraq funksiyaları yerinə yetirir. Gəlin yeni cihazın işləmə prinsipinə daha yaxından nəzər salaq. Cihazın çəkisi 7.5 qramdır və qalınlığı sadəcə 0.7 mm-ə bərabərdir. Bununla da cihaz uzun istifadə olunsa belə heç bir problem yaratmayacaq. Texnologiyanı insanlar üçün daha rahat etmək missiyasına sahib startapın yeni cihazı Linux, Windows, macOS, iOS və Android ilə heç bir problem yaratmadan işləyə bilir. Cihaz Bluetooth vasitəsilə kompüter və smartfonlara qoşulur. İstifadəçi dilini yuxarı damağa yapışdırdıqda cihaz kursora sol klikləyir, isə sağ klikləyir. Bundan əlavə isə şirkət müxtəlif baş hərəkətlərini, dişləməyi də yeni funksiyalara çevirməyə çalışır.
Yeni MouthPad texnologiyası ilkin mərhələdə sadəcə əlil insanlar üçün nəzərdə tutulsa da, bu cihaz gələcəkdə daha fərqli sahələrdə də istifadə edilə bilər. 2 saat tam şarj olduqdan sonra 5 saat aktiv istifadə edilə bilən cihaz hazırda sınaq mərhələsindədir. Cihazın yaxın aylarda satışa çıxarılacağı gözlənilir.
