Çinin texnologiya nəhəngi Xiaomi şirkəti ilə Yaponiyanın texnologiya nəhəngi Sony kamera mərkəzli əməkdaşlıq qurmuş ola bilər. Bildiyimiz kimi Xiaomi, Sony kameralarının ən böyük alıcılarından biri hesab olunur. Xiaomi şirkətindən əlavə bir çox texnologiya şirkəti öz cihazlarında Sony istehsalı kameralardan istifadə edir. Bunun səbəbi isə Sony şirkətinin kamera sahəsində ixtisaslaşmasıdır. Başqa sözlə desək, Sony keyfiyyətli və sərfəli kameraları ilə bazarda birinci yerdədir. Qeyd edək ki, Xiaomi şirkətinin yeni flaqman smartfonu olan Xiaomi 13 Ultra 4 ədəd fərqli Sony imzalı kamera sensoruna sahibdir. Bu kameralardan biri 1 düymlük 50 MP təsvir ölçüsü IMX989-dur. Bu kamera sensoru çox yüksək keyfiyyətli şəkil və videolar çəkə bilir. Xiaomi 13 Ultra smartfonu həmçinin 1/2.51 düymkük 50 MP Sony IMX858 sensorları ilə də təchiz edilib.
Bir çox smartfon modellərində Sony kameralarını seçən Xiaomi şirkəti Sony ilə yeni bir layihə üçün əməkdaşlıq edəcək. Bu əməkdaşlığın arxasında isə yeni mobil kamera sensorunun dayandığı iddia olunur. That_Kartikey ləqəbli insayder öz Twitter hesabında bu barədə paylaşım edib. O qeyd edib ki, Xiaomi və Sony şirkətinin hazırlayacağı yeni kamera sensoru 1 düymdən daha böyük ola bilər. Yəni texnologiya nəhəngləri bazara möhtəşəm bir kamera çıxarmağı planlayırlar. Bilirik ki, düym artdıqca kameraların keyfiyyəti də avtomatik olaraq artır. Məhz bu səbəbdən də fotoaparatlarda olan kamera sensorları mobil cihazlardan daha yüksək keyfiyyətli şəkillər şəkir. Texnologiya nəhəngləri isə fotoaparatlar ilə rəqabət apara biləcək mobil kamera sensoru hazırlamaq niyyətindədirlər.
Xiaomi və Sony şirkətlərinin birgə əməkdaşlıq layihəsinin hazırda inkişaf mərhələsində olduğu bildirilir. Hətta yeni kamera sensorunun 2024-cü ildə təqdim ediləcəyi də bildirilir. Xiaomi bu sensoru gələcəkdə təqdim edəcəyi yeni Xiaomi 14 Ultra modelində tətbiq edə bilər. Əslində Xiaomi indiyə qədər əsasən Leica ilə əməkdaşlıq edirdi. Lakin Huawei şirkəti son dövrlərdə Leica brendinin öz tərəfinə çəkdiyi üçün Çin texnologiya nəhəngi də özünə yeni yoldaş tapıb.
