Apple şirkəti ötən aylarda təqdim etdiyi flaqman iPhone 15 seriyası ilə gündəmdə qalmağı və bir çox həvəskarını sevindirməyi bacarmışdı. Görünən odur ki, amerikalı texnologiya nəhəngi bu il təqdim edəcəyi smartfon seriyası ilə istifadəçilərinə daha üstün performans vəd edəcək. Belə ki, məşhur analitik Jeff Pu-ya görə Apple yeni iPhone 16 və iPhone 16 Plus modellərini 8GB ram və Wi-Fi 6E texnologiyası ilə təchiz edə bilər. Analitikin fikrincə Apple standart modellərinə qarşı strategiyasında əhəmiyyətli dəyişiklik etməyi düşünür.
Məhz smartfon seriyalarındakı standart modellərə qarşı olan strategiyada ediləcək ilk dəyişikliklərdən biri də 8GB ram və Wi-Fi 6E texnologiyası olacaq. İddialara görə iPhone 16 və iPhone 16 Plus modelləri bu il 8GB ram və Wi-Fi 6E ilə təchiz edilərək performansını əhəmiyyətli dərəcədə artıracaq. Qeyd edək ki, hazırda iPhone 15 seriyasına daxil olan iPhone 15 və iPhone 15 Plus modelləri yalnız 6GB ram seçimi ilə təklif olunur. Lakin Apple şirkətinin edəcəyi dəyişiklik ilə indi yeni flaqman smartfon istifadəçiləri bir çox tapşırığı və tətbiqi eyni anda smartfonlarında aça biləcək.
Apple sadəcə yaddaş dəyişikliyi ilə yetinməyib istifadəçilərinə sürətli yükləmə təmin edə bilmək üçün iPhone 16 və iPhone 16 Plus modellərini 6GHz tezliyindən istifadə edən Wi-Fi 6E ilə təchiz edəcək. Qeyd edək ki, hazırda yalnız iPhone 15 Pro modelinə bu texnologiya yer alır. Digər maraqlı dəyişiklik kamera dizaynında ola bilər. Pu deyir ki, Apple son modellərdə görünən diaqonal dizayndan uzaqlaşaraq, iPhone 12-yə bənzər kamera dizaynından istifadə etməyi düşünür. Bu dəyişikliklər standart iPhone 16 modellərini Pro versiyalarına daha çox bənzədəcək. Təbii ki, yeni iPhone 16 Pro modellərində də bəzi unikal dəyişikliklərin olacağı şübhəsizdir.
