Alış-veriş nəhəngi IKEA bu gün maraqlı açıqlama verib. Belə ki, IKEA şirkəti tezlikcə açacağı virtual Roblox mağazasında ödənişli işçilər işlədəcək və onların sayı 10 nəfər olacaq. Qeyd edək ki, IKEA 24 iyunda Roblox daxilində virtual mağaza (The Co-Worker Game) açacaq. Yalnız Böyük Britaniya və İrlandiya Respublikasında yaşayan 18 və daha yuxarı yaşda olan şəxslərə iş təklif edən şirkət bu mövzuda yeni bir cığır açdıqlarını bildirir.
“Roblox-da ödənişli iş təklif edən ilk brend olmaqdan məmnunuq. IKEA-da karyera inkişafı üçün vahid müəyyən yol yoxdur. Həmkarlarımız həm oyunda, həm də real dünyada rollarını dəyişə, şöbələri dəyişə və ya özlərini istədikləri istiqamətdə inkişaf etdirə bilərlər. IKEA-da öyrənmək və böyümək üçün bir çox yol var və Roblox-da IKEA-nın əsas məqsədi budur.” deyə IKEA rəsmi açıqlama verib. Xatırladaq ki, şirkət daha əvvəl oyunçular üçün xüsusi olaraq IKEA Brännboll kolleksiyasını elan etmişdi. Brännboll kolleksiyası 20 fərqli məhsuldan ibarətdir və bu məhsulların demək olar ki, hamısı onların oyun həlli olduğunu açıq şəkildə göstərmir.
Ümumiyyətlə, son dövrlərdə Roblox virtual oyun platformasının populyarlaşması, minlərlə istifadəçinin platformada vaxt keçirməsinə səbəb olub. Məhz belə bir dövrdə virtual IKEA mağazasının yaranması fikri bütün diqqətləri şirkətin üzərinə çəkməsinə də səbəb olub. Qeyd edək ki, IKEA 10 nəfərlik virtual mağaza işçisinə saatlıq 13.15 avro yəni, 24 manat 33 qəpik təklif edəcək.
