Texnologiya inkişaf etdikcə kibercinayətkarlıq sahəsində də yeni viruslar və yeni metodlar ortaya çıxır. Belə ki, ThreatFabric-in kibertəhlükəsizlik mütəxəsisslərinin aşkar etdiyi yeni Android virusu artıq barmaq izi qorumasını belə aldadır və smartfona daxil olur. Ümumiyyətlə hazırda bir çox android smartfon barmaq izi qorunmasına sahibdir. Hətta şirkətlər barmaq izi oxuyucusunu smartfon ekranlarının altına qədər inteqrasiya etməyi bacarıblar. İndi isə məlum olub ki, viruslar smartfon və planşetlərdəki biometrik qorunmadan yan keçə bilir.
Ümumiyyətlə viruslar məşhur proqramların adı ilə smartfon və planşetlər arasında yayılır. Hətta kompüterlərdə də viruslar maskalanaraq hərəkətə keçir. Android smartfonlarında isə tez-tez viruslar Google Chrome brauzerinin quraşdırılma faylı kimi maskalanır. Kibercinayətkarlar əvvəllər Polşa və Avstraliyadakı istifadəçilərə kütləvi hücumlar etsələr də, indi əsas diqqəti Böyük Britaniya və İtaliyadakı istifadəçilərə yönəldiblər. Hətta onlar bu addımı yeni virus ilə atıblar.
Biometrik mühafizə üsullarından yan keçə bilən virus ilk dəfə 2023-cü ilin əvvəllərində aşkarlanıb. Əsasən bank və kriptovalyuta proqramlarını hədəf alan virus indi yenilənib. Belə ki, artıq yeni Android virusu olaraq qarşımıza çıxan bu virus barmaq izi qorumasını belə aldadır. Zərərli proqramı quraşdırdıqdan sonra istifadəçiyə HTML səhifəsi təqdim olunur ki, bu da onları xüsusi funksiya parametrlərini açmaq üçün məcbur edir. Məhz bu da virusun barmaq izi kimi digər biometrik qorunma üsullarından yayınmasına kömək edir.
