Yaponiyada bir çox elektromobil istifadəçisinin xəyalı reallaşacaq. Belə ki, şərqi asiyanın ən inkişaf etmiş ölkələrindən biri olan Yaponiyada elektromobillər işıqforda gözləyərkən şarj olacaq. Bu layihə yaponiyanın yeni ağıllı şəhəri “Kashiwa-no-ha”-da işıqforlara simsiz enerji doldurma sistemi quraşdırılmaqla həyata keçiriləcək. Beləliklə əsas ideya elektromobillərin batareya və ya məsafə məhdudiyyətini aradan qaldırmaqdır. Yaponlar düşünür ki, işıqforlara enerji stansiyası yerləşdirmək elektromobillərin şarj problemini böyük ölçüdə aradan qaldıracaq.
Qeyd edək ki, ağıllı şəhər Kashiwa-no-ha Yaponiyanın paytaxı Tokio-ya yaxınlıqdadır. Hətta bu layihə Tokio,Çiba universistetləri və Bridgestone, NSK, Denso kimi şirkətlərin əməkdaşlığı əsasında həyata keçiriləcək. Şəhərin ağıllı adlandırılmasının əsas səbəbi isə bu şəhərin ağıllı nəqliyyat sistemləri üçün nümunəvi şəhər olmasıdır. Qeyd edək ki, Tokio universiteti layihədə mobil enerji təchizatı sistemini hazırlayıb. Hazırda isə bu sistem dayanıqlılıq və onun üzərindən keçən zaman avtomobilləri ardıcıl olaraq şarj edib-etməməsi üçün sınaqdan keçirilir.
Layihəyə görə şarj blokları işıqforların yaxınlığında yer altına basdırılır. Bir elektromobilin simsiz şarj cihazının üzərindən keçdiyi aşkar edildikdə isə, cərəyan verilməyə başlayır. Nəqliyyat vasitələrinin təkərlərinin yanında yerləşdirilən xüsusi avadanlıq isə elektromobilin sürəti aşağı olduqda elektrik enerjisi alır. Maraqlısı budur ki, sadəcə 10 saniyəlik şarj elektromobillərin əlavə 1 km məsafə qət etməsinə imkan verəcək. Layihə şəhər içində şarj stansiyası azlığı ilə üzləşən istifadəçilər üçün nəzərdə tutulub.
