Xiaomi firmasının ard-arda anons etdiyi qəribə məhsulların siyahısı genişlənməyə davam edir. Elə ötən günlərdə belinizə taxdıqda kürəyinizi, üstünə qoyduqda notbukunuzu soyudan Xiaomi Korin zero çantasını, daha sonra 50MP kameraya sahib Xiaomi Mijia ağıllı eynəyini sizlərlə bölüşmüşdük. Şirkət bu cür innovativ cihazlar anons etmək silsiləsinə dayanmadan davam etdirir. Belə ki, Xiaomi firması tərəfindən dünən axşam cihazları beyin dalğası ilə idarə edə bilən Xiaomi MiGu baş bandı nümayiş etdirlib.
Xiaomi MiGu baş bandı layihəsinin məqsədi ekosistemi təkmilləşdirməkdir
Yeni baş bandı, Xiaomi Group tərəfindən keçirilən hakatonda qalib gələn Xiaomi mühəndislərinin layihəsidir. Xiaomi MiGu baş bandı ətrafdakı cihazları beyin vasitəsilə idarə etməyə imkan verir. Cihazın üzərində beyin siqnallarını qəbul edərək işləyə bilən üç fərqli sensor mövcuddur. Siz hər hansı bir işi görmək üçün beyninizdə əmr verməyi düşündükdə bu cihaz beyin siqnallarınızla oxuyur və prosesi icra edir. Başlanğıc mərhələsində olan layihənin hal-hazırda Xiaomi firmasının ekosisteminə aid cihazların işləməsini asanlaşdıracağı deyilir. Lakin gələcəkdə smartfonunuzla idarə edə bildiyiniz fərqli işlərin də hazırlanacaq uyğun bir tətbiq vasitəsilə smartfona toxunulmadan görülməsi planlaşdırılır.
Xiaomi MiGu baş bandını daha da önə çıxaran digər bir xüsusiyyət baş beyinin elektrik aktivliyini (EEQ) ölçə bilməsidir bilməsidir. İnsanların duyğularına bağlı olaraq beyin siqnalları dəyişə bildiyindən bu cihazın EEQ-ni ölçə bilməsi dəqiq və həssas işləməsinə kömək edəcək. Eyni zamanda yorğunluq kimi göstəriciləri də analiz edərək istifadəçiyə bildirəcək.
Xiaomi firmasının yeni layihəsi olan MiGu baş bandının hələ ki, satışa çıxarılıb-çıxarılmayacağı dəqiq deyil. Lakin baş bandı prototipdən daha çox seriya istehsalına yaxın bir cihaz kimi görünür. Siz bu cihaz barədə nə düşünürsünüz? Fikirlərinizi rəylərdə bizimlə bölüşə bilərsiniz.
