Bu gün milyonlarla istifadəçi tərəfindən aktivi istifadə olunan mesajlaşma platforması olan WhatsApp daha bir yenilik edib. Belə ki, artıq WhatsApp platformasında yüksək keyfiyyətli şəkillər göndərmək mümkündür. Ümumiyyətlə Meta çətiri altında olan bütün sosial şəbəkə platformaları, o cümlədən Whatsapp daim yenilənir. Hətta ötən günlərdə WhatsApp platformasında süni intellekt ilə təsəvvür edilən stikerləri yaradan yeni xüsusiyyətin hazırlandığından xəbər vermişdik. Bundan əlavə daim yeni ifadələr və xüsusiyyətlər üzərində çalışan şirkət Telegram ilə rəqabət aparır.
Hazırda milyonlarla istifadəçi WhatsApp platformasından istifadə etsə də, bəzi məhdudiyyətlər səbəbindən istifadəçilərin bir çoxu Telegrama yönəlir. Bunu görən Meta tədricən məhdudiyyətləri aradan qaldırır. Belə ki, ötən günlərdə WhatsApp platformasına kanal funksiyasının əlavə ediləcəyi ortaya çıxmışdı. İndi isə WhatsApp yüksək keyfiyyətli şəkillər göndərməyə imkan verəcək. Daha əvvək platformada nə qədər yüksək keyfiyyətli şəkil göndərilsə də, müəyyən qədər keyfiyyət itirdi. Məhz bu xüsusiyyət WhatsApp platformasının əsas məhdudiyyətlərindən idi. Artıq bir-birinəz keyfiyyətli şəkil göndərmək üçün Telegrama ehtiyac qalmayacaq. Bu yenilikdən əlavə yüksək keyfiyyətli videolar üçün “HD” düyməsi də yaxın vaxtlarda platformaya əlavə olunacaq. Bu yeniliyin ardıyca gələcək HD videos parametri ehtimallara görə il sonuna qədər əlçatan olacaq.
Qeyd edək ki, bu barədə Meta şirkətinin qurucusu Mark Zuckerberg məlumat verib. O bildirib ki, artıq həm Android, həm də iOS cihazlarda HD şəkil göndərmək mümkündür. Bu funksiyası müəyyən müddət beta versiyasında sınaqdan keçirildikdən sonra bütün istifadəçilər üçün əlçatan olur. Siz şəkillərinizi keyfiyyət itmədən göndərmək istəyirsinizsə sadəcə ekranda çıxan HD işarəsinə toxunmalı olacaqsınız. Maraqlısı budur ki, WhatsApp yüksək keyfiyyətli şəkil göndərdiyiniz şəxsə xəbərdarlıq edəcək.
