Meta şirkətinin WhatsApp tətbiqi yeniliklər etməyə davam edir. Belə ki, WhatsApp tətbiqi Telegram tətbiqində hərkəs tərəfindən istifadə edilən kanal funksiyasını əlavə edəcək. Qeyd edək ki, məşhur mesajlaşma tətbiqi bundan əvvəl də Telegram tətbiqində rast gəldiyimiz funksiyaları əlavə etmişdi. Görünən odur ki, Meta Telegram tətbiqindən istifadə edənləri də öz tətbiqinə yönəltməyə çalışır. Hətta bununla bağlı şirkət daim yeniliklər edir. Sonuncu dəfə isə WhatsApp, Telegram tətbiqində olduğu kimi böyük həcmli fayl, şəkil və videoları göndərmək funksiyasını əlavə edəcəyini bildirmişdi.
Qeyd edək ki, WhatsApp tətbiqinə əlavə ediləcək yeni kanal funksiyası artıq inkişaf mərhələsindədir. Belə ki, bu barədə Vabetainfo tərəfindən bəzi görüntülər də paylaşılıb. Qeyd edək ki, yeni funksiya artıq tətbiqin 2.23.10.14 beta versiyası üçün əlçatandır. Hələlik WhatsApp kanallarda üzv sayını limitləmədiyini bildirib. Həmçinin kanal üzvləri mesaj göndərən şəxsin nömrəsini görməyəcək. Beləliklə istifadəçilərin gizliliyi qorunacaq. Lakin kanaldakı mesajların və ya məlumatların ucdan-uca şifrələnib şifrələnməyəcəyi məlum deyil. Bu isə kanallarda mövcud olacaq məlumatları təhlükə altına atır.
Çox güman ki, WhatsApp kanal daxilində olan bütün məlumatları da ucdan-uca şifrələyərək məxfiliyi qoruyacaq. Çünki, şirkət indiyə qədər məhz təhlükəsizlik və məxfilik prinsipinə əsaslanaraq fəaliyyət göstərib. Yeni funksiyanın da bu prinsipə uyğunlaşdırılacağı gözlənilir. Hələlik yeni funksiyanın nə zaman istifadəyə veriləcəyi və təqdim ediləcəyi bəlli deyil. İnsayderlər yeni funksiyanın yaxın günlərdə təqdim ediləcəyini idda edir.
