WhatsApp istifadəçilərinin çoxdandır ki, gözlədiyi funksiya artıq əlçatan olur. Belə ki, artıq WhatsApp tətbiqində eyni anda 2 hesabdan istifadə etmək dövrü başlayır. Beləliklə tətbiqdə bir çox hesab arasında keçid etməyi WhatsApp daha asan edir. Yəni iki WhatsApp hesabından istifadə edənlər artıq 2 smartfondan istifadə etmək məcburiyyətində qalmayacaq. Sadəcə 1 smartfon ilə bütün hesablarınız arasında keçid edə biləcəksiniz.
Qeyd edək ki, Meta şirkətinin CEO-su Mark Zuckerberg bu gün elan edib ki, WhatsApp Androiddə eyni anda 2 hesabdan istifadə etmək funksiyasını təqdim edib. Onun sözlərinə görə artıq bir neçə hesabdan istifadə etmək üçün əlavə cihaz daşımağa və ya hesabınızdan tamamilə çıxış etmək lazım olmayacaq. Maraqlısı budur ki, WhatsApp hesablarınız arasında Instagramda olduğu kimi rahat və sürətli keçid etmək mümkündür. Onu da qeyd edək ki, eyni telefonda iki “WhatsApp” hesabından istifadə etmək imkanı yaxın həftələrdə əlçatan olacaq.
Metanın açıqlamasına görə, ikinci hesab yaratmaq istəyirsinizsə, yenə də ayrıca telefon nömrəsinə və ya SİM karta ehtiyacınız olacaq. Bununla belə, hesabın əlavə edilməsinin ilkin yoxlanılmasından sonra tətbiqin ikinci cihaz və ya SIM olmadan hər iki hesab üçün işləməyə davam edəcəyi bildirilir. Həmçinin hər hesabın öz məxfilik və bildiriş parametrləri olacaq. Həmçinin istifadəçilər fərqli hesabları üçün müxtəlif bildiriş səslərindən istifadə edə biləcəklər.
