Dünyanın ən məşhur canlı yayım platformalarından biri olan Twitch Türkiyədə məhdudlaşdırıldı. Qeyd edək ki, Türkiyənin Milli Lotereya idarəsinin qərarı ilə artıq Twitch platformasına Türkiyədən olan istifadəçilər daxil ola bilməyəcək. Bunun əsas səbəbi kimi isə illeqal qumar və mərc oyunları olaraq göstərilir.
Ümumiyyətlə, Twitch platforması Türkiyədə eledə də dünyada çox məşhur idi. Yüz minlərlə istifadəçi eyni anda canlı olaraq öz profilindən yayım edən şəxsləri izləyir. Müxtəlif oyunlar və ya məzmunlarla istifadəçiləri özünə cəlb edən yayımcılar həmçinin istifadəçilər tərəfindən mükafatlandırılır. Türkiyədən olan minlərlə istifadəçi də hər gün aktiv olaraq platformadan istifadə edirdi. Lakin Milli Lotereya idarəsi Twitch-də “Casino” kateqoriyasında qeyri-qanuni qumar və mərc oyunları ilə bağlı canlı yayımlar olduğundan platformaya girişi tarix vermədən məhdudlaşdırıb.
22 fevral 2024-cü il 2024/7 saylı qərar ilə artıq platformaya Türkiyədən giriş bloklanıb. Xatırladaq ki, eyni səbəbdən sadəcə 2 gün əvvəl 20 fevral tarixində Twitch rəqibi Kick də ölkədə məhdudlaşdırılmışdı. Türkiyənin Milli Lotereya idarəsi bildirir ki, Twitch Türkiyədən olan istifadəçilər üçün Casino kateqoriyasını qaldırsa o zaman platforma üzərindəki qadağa qüvvədən düşə bilər. Lakin hələlik, platformadan rəsmi olaraq qərara cavab verilməyib. Qeyd edək ki, ölkəmizdən də minlərlə istifadəçi Türk yayımcılarını izləyirdi və onlara dəstək verirdi.
