Bildiyimiz kimi, hazırda dünyada ən çox tətbiq edilən iş rejimi 5 günlük iş rejimidir. Hətta ölkəmizdə də əksər müəssisələrdə 5 günlük iş rejimi tətbiq olunur. Lakin son dövrlərdə dünya bir çox sahədə olduğu kimi iş rejimi tərəfində də yenilik etməyə hazırlaşır. Belə ki, Böyük Britaniyada dünyanın ən əhatəli 4 günlük iş təcrübəsinin nəticələri açıqlanıb. Qeyd edək ki, araşdırma Cambridge Universiteti tərəfindən də dəstəklənib. Beləliklə, Birləşmiş Krallıqda 4 günlük iş sınağında iştirak edən şirkətlərin əksəriyyəti nəticələrdən razıdır.
Böyük Britaniyada mərkəzli Autonomy-nin 2022-ci ilin iyun və dekabr ayları arasında təşkil etdiyi araşdırmada ölkədən 61 şirkət qatılıb. Nüfuzlu Cambridge Universiteti ilə yanaşı, ABŞ-dan Boston Kolleci və Salford Universitetinin də daxil olduğu tədqiqatın nəticələri fevralın 21-də dərc edilib. Sınaqda iştirak edən 61 şirkətdən 54-ü yəni 89% 4 günlük iş rejimini davam etdirib, 31-i yəni 54%-i isə onu daimi hala gətirməyə qərar verib. Ümumilikdə isə layihə menecerləri və CEO-ların 55 faizi 4 günlük iş sisteminin şirkətlərinə müsbət təsir etdiyini bildirib.
Araşdırmanın müəllifi Juliet Schor, 6 aylıq sınaq müddətində 4 günlük iş rejimindən əhəmiyyətli səmərəliliyin əldə edildiyinə diqqət çəkdi. Habelə Boston Kollecində çalışan akademik bildirib ki, “İşçilərin fiziki və ruhi sağlamlığı və iş-həyat balansı 6 ay əvvəlki ilə müqayisədə əhəmiyyətli dərəcədə artıb”. Eləcə də işçilərin 96 faizi 4 günlük iş rejiminin şəxsi həyatına müsbət təsir etdiyini bildirib. Araşdırmada iştirak edən şirkətlər əsasən marketinq və reklam sahəsində fəaliyyət göstərsələr də, bunlarla yanaşı tikinti, istehsal, pərakəndə satış, səhiyyə və əyləncə sektorlarında fəaliyyət göstərən şirkətlər də sınaq prosesində iştirak ediblər.
