2018-ci ilin ən mühüm hadisələrindən biri, şübhəsiz ki, dünyanın ən güclü raketi olaraq xarakterizə edilən Falcon Heavy-nin ilk uçuşu olmuşdu. Uçuşun daha maraqlı olması üçün Elon Musk öz Roadster avtomobilini də raketə birləşdirmişdi. İlk illərdə canlı yayımlanan və yaxından izlənilən Starman ləqəbli vasitə zamanla əhəmiyyətini itirərək unudulub. Yeddi il sonra isə, Elon Musk-ın kosmosda uçan Tesla Roadster-i tədqiqatçılar tərəfindən asteroidlə səhv salınıb.
Harvard Universitetinin tədqiqatçıları yanvarın əvvəlində Yerə təhlükəli dərəcədə yaxın olduğunu düşündükləri asteroidi kəşf ediblər və onu 2018 CN41 olaraq qeyd etdilər. Ancaq tezliklə bunun Tesla Roadster olduğu məlum olub. Tədqiqatçılar obyektin asteroid rekordlarından silindiyini elan etdikdə alimlər arasında reaksiyalar artıb. Bildirilib ki, bu cür reklam kampaniyaları Yer kürəsini potensial təhlükəli asteroidlərdən qorumaq səylərinə zərbə vurur.
Bundan əlavə isə Elon Musk-ın SpaceX şirkəti kosmos fəaliyyətlərində tarixi uğur qazanıb. Belə ki, şirkət yanvarın 21-də Starlink peykinin buraxılışı zamanı Falcon 9 raketinin birinci mərhələsini uğurla Yerə qaytarmaqla 400-cü raket enişini qeyd edib. Vandenberq Kosmik Qüvvələri Bazasından atılan Falcon 9 raketi 27 Starlink internet peykini müvəffəqiyyətlə aşağı Yer orbitinə aparıb.
