Telegram-ın baş direktoru Pavel Durovun Fransada həbs olunmasında və ardınca sərbəst buraxılmasından sonra Telegram, mesajlaşma platformasının xidmət şərtlərini və məxfilik siyasətini yenilədiyini paylaşıb. Bu dəyişikliklərə əsasən, platforma qanunu və ya Telegram qaydalarını pozan istifadəçilərin IP ünvanlarını və telefon nömrələrini “müvafiq orqanlara” açıqlaya bilər.
Bazar ertəsi Telegram-ın baş direktoru Pavel Durov, öz kanalı vasitəsilə platformanın məxfilik siyasətini və xidmət şərtlərini yenilədiyini açıqlayıb. Xatırladaq ki, 39 yaşlı fransız əsilli rusiyalı avqustun 24-də həbs edilib və o, narkotik alveri, fırıldaqçılıq, porno yayımı və çirkli pulların yuyulması da daxil olmaqla cinayət fəaliyyətlərinə yardım etməkdə ittiham olunub. milyon avro (5,5 milyon dollar) girov ödədikdən sonra Durov sərbəst buraxılmış və sentyabrın əvvəlində Fransa hakimiyyətinin atdığı addımları müzakirə edərək ictimaiyyətə müraciət etmişdi.
İki həftə sonra Durovun Telegram kanalı platformanın ən son yeniləmələrini bildirib. O qeyd edib ki, xüsusi moderatorlar qrupu son bir neçə həftə ərzində problemli məzmunu izləyir və bu iş prosesini sürətləndirmək üçün komanda süni intellektdən (AI) istifadə edir. Nəticədə Telegram-ın axtarış sistemi məhdudlaşıb və zərərli məzmunlar “artıq əlçatan olmayıb”. Bununla belə, istifadəçilər platformanın Axtarış Hesabatı kanalı vasitəsilə rastlaşdıqları hər hansı qeyri-qanuni materialı bildirməyə təşviq edilir. “Telegram Axtarışından cinayətkarların sui-istifadə etməsinin qarşısını almaq üçün biz Xidmət Şərtlərimizi və Məxfilik Siyasətimizi yenilədik və onların qlobal miqyasda ardıcıl olmasını təmin etdik. Biz aydınlaşdırdıq ki, qaydalarımızı pozanların IP ünvanları və telefon nömrələri etibarlı hüquqi sorğulara cavab olaraq müvafiq orqanlara açıqlana bilər” deyə Telegram açıqlama verib.
