SpaceX bu yaxınlarda Starlink peykləri üçün yeni təkmilləşdirmə işlərinin aparacağını açıqladı. Bu qərarın səbəbi isə qlobal astronomik fəaliyyətlər üçün səmaya müdaxilənin azaldılmasıdır. Belə ki, Starlink peyklərinin Yerin orbiti üzrə hərəkət edərkən əks etdiyi Günəş şüaları ciddi problemlər yaradır. SpaceX-in məlumatına görə, yeni 2.0 peykləri standart əməliyyat hündürlüklərində olduqda artıq adi gözlə görünməyəcək. Hal-hazırda orbitdə olan Starlink peykləri, əks etdirdikləri işıq səbəbi ilə gecə müşahidələrinə müdaxilə etdikləri üçün astronomiya ictimaiyyətindən mənfi reaksiya alırlar.
Yeni nəsil Starlink peykləri əks olunmanı 10 dəfəyə qədər azaldacaq
SpaceX problemləri həll etmək üçün gələcək yeni Starlink peykləri üçün xüsusi örtük filmi hazırlayıb. Bu filmin məqsədi günəş işığının çox hissəsini udmaq, peykləri Yerdən daha az görünən etməkdir. SpaceX tərəfindən dərc edilən sənədə görə, yeni film indiki nəsil peyklərdə əks olunmanın qarşısını almağa yönəlmiş filmdən 10 dəfə daha effektivdir.
Starlink peykləri eyni zamanda işığın əks olunmasını daha da azaltmaq üçün axşam vaxtlarında öz trayektoriyasını dəyişdirəcək. Şirkət bildirir ki, bu yerdəyişmə fəaliyyəti peyklərin 25% əlavə enerji sərf etməsinə gətirib çıxaracaq.
Qeyd edildiyinə görə, şirkətin Starlink Peyklərinin 2.0 variantında peyklərin işığı əks etdirməsi problemindən əlavə müxtəlif düzəlişlər etməsi də gözlənilir. Əlavə olaraq hazırlanmış yeni işığı 10 dəfə daha çox udan örtüklər rəqib şirkətlərə də satılacaq. Məsələn, Amazon yaxın vaxtlarda Project Kuiper layihəsini istifadəyə verəcək. Həmin Project Kuiper layihəsi Starlink ilə eyni internet xidmətini vermək üçün hazırlanıb. Ehtimallara görə SpaceX bu örtüyü Amazon kimi şirkətlərin də istifadəsi üçün tədarük edəcək. Astronomiya sahəsində tədqiqatçılar isə hələ də problemin tam olaraq həll olmayacağı fikrindədirlər.
