Smartfonların boydan-boya ekranlarında istifadəçi təcrübəsinə ən böyük mənfi təsir göstərən nüans selfi kameralarıdır. Yeni nəsil istehsal texnologiyaları ilə, deşikli selfi kameralarının ekran üzərində yaratdığı boşluğun ölçüsü əhəmiyyətli dərəcədə kiçilib. Lakin buna baxmayaraq ön kameralar yenə adi gözlə rahat görüldüyündən ekran altına yerləşdirilmiş kamera sensorları qədər xoş təsir bağışlamırlar. Digər bir tərəfdən ekran altına yerləşdirilmiş selfi kameraları qiymətə əhəmiyyətli dərəcədə mənfi təsir etdiyindən bu gün cihazlara kütləvi şəkildə quraşdırılmır. Eyni zamanda ekran altı kameralar ilə çəkilən şəkillərin keyfiyyəti də məhz flaqman smartfonlar üçün qane edici səviyyədə deyil. Ona görə şirkətlər bu problemin həlli üçün yeni həll yolları axtarırlar. Sony şirkəti isə bu məqamda ortaya çıxaraq yeni üsulla selfi kamerasını ekran çərçivəsinə inteqrasiya etməyə hazırlaşır.
Sony şirkəti mikro ölçülü sensorlar ilə selfi kamerasını çərçivəyə yerləşdirə bilər
Kamera sensoru istehsalçıları arasında ən böyük bazar payından birinə sahib, lider deyə biləcəyimiz istehsalçı Sony şirkətidir. Samsung şirkətinin flaqman modellərini kənara qoysaq, demək olar bütün ən çox tanınmış premium smartfon istehsalçıları Sony şirkətinin kamera sensorlarından istifadə edir. Ona görə də mobil kamera sənayesində yüksək təcrübəyə malik Sony şirkəti selfi kamerasına yenilik gətirə biləcək ən güclü adlardan biridir.
Ötən gün Sony Xperia 1 V modelinə aid render görüntüləri internetə sızdırılmışdı. Həmin cihazın ən üst çərçivəsinə yaxından baxdıqda ardıcıl düzülmüş nöqtələr əks edilib. Ekranda isə bizə tanış olan ənənəvi ön kamera mövcud deyil. İnsayderlər bildirir ki, bu model Sony tərəfindən hazırlanmış mikro ölçülü ön kamera texnologiyasının işlədildiyi ilk smartfon olacaq.
“Micro-matrix multi camera” olaraq adlandırılan bu texnologiyanın detalları barədə ətraflı informasiya mövcud deyil. Lakin böyük bir ehtimalla şəkillərdə də gördüyünüz mikro ölçülü sensorların çəkdiyi görüntülər xüsusi proqram təminatı vasitəsilə birləşdirilərək emal ediləcək (çəkiləcək). Sony şirkətinin Xperia 1 V modelində 4 fərqli nöqtə mövcuddur, amma bu nöqtələrin hamısının selfi kamerası üçün nəzərdə tutulmadığı bildirilir. Görüntülər render olduğu üçün ola bilsin 3 ardıcıl nöqtə kamera sensoruna aid olsa da biri yaxınlıq sensorunu təmsil edir.
Növbəti illərdən digər şirkətlərin smartfonlarında da Sony şirkətinin yeni selfi kamerası texnologiyasını görəcəyimizi ümid edirik. Bənzər texnologiyanın hal-hazırda hazırlıq mərhələsində olduğu iddia edilən Google Pixel Fold modelində mövcud olduğu bildirilir. Lakin bu texnologiyanın Sony şirkəti ilə əlaqəli olub-olmadığı naməlumdur.
