Nəhayət ötən gün Qualcomm şirkəti Snapdragon 782G çipsetini rəsmi olaraq elan etdi. Az sonra təqdimatını sizinlə bölüşəcəyimiz Honor 80 modelinə quraşdırılmış Snapdragon 782G çipseti, əslinə qalsa Snapdragon 778G+ çipsetinin təkmilləşdirilmiş halıdır. Çox təəssüf ki, Snapdragon 7 Gen 1 seriyası belə bazarda olsa da bu dəqiqə orta-üst seqmentdə Qualcomm şirkəti Dimensity 8XXX seriyası ilə rəqabət apara biləcək həll ortaya çıxarmır. Nəticə etibarilə Snapdragon 782G çipseti də performans cəhətdən həm Dimensity 8100 çipsetindən olduqca geri qalır, həm də Snapdragon 778G+ ilə müqayisədə elə bir performans fərqi gətirmir. Dimensity 8200 çipsetinin orta seqmentdə Snapdragon 8 Gen 1 çipsetini hədəf alacağını düşünsək, şirkətin işi daha da çətinləşəcək.
Belə ki, bu çipsetin əsas məqsədi 200MP kamera sensorları üçün dəstək gətirməkdir. Yeni nəsil Spectra ISP çipi orta seqment cihazlarda 200MP təsvir ölçüsünə qədər kameraların işlədilməsini mümkün edir. Eyni zamanda 14 bit-ə qədər görüntülərin işlənməsi dəstəkləyir.
Performans baxımından da Snapdragon 778G+ ilə müqayisədə CPU tərəfində 5%, GPU tərəfindən 10% performans artımı müşahidə edilir. Snapdragon 782G çipseti uyğun olaraq TSMC-nin 6nm texnoloji prosesi üzərinə istehsal edilir. 1 ədəd 2.72 GHz tezlikli Cortex-A78 nüvəsinə, 3 ədəd 2.4 GHz tezlikli Cortex-A78 nüvəsinə və 4 ədəd 1.8 GHz tezlikli Cortex-A55 nüvəsinə sahibdir. Qrafik çipi tərəfində isə Adreno 642L işlədilib. Böyük bir ehtimalla bu qrafik çipinin də tezliyi artırılıb, lakin dəqiq bir məlumat mövcud deyil.
- 1 x Cortex-A78 (2.72 GHz)
- 3 x Cortex-A78 (2.4 GHz)
- 4 x Cortex-A55 (1.8 GHz)
Bu çipsetlə bağlı digər bir mənfi məqam isə 4K keyfiyyətdə maksimum 30FPS videoları qeydə ala bilməsidir. Specrta ISP çipi 200MP üçün təkmilləşdirilsə də 4K keyfiyyətdə 60FPS video qeyd dəstəyi gətirilməyib. Texniki cəhətdən Snapdragon 782G çipseti ilə FHD+ təsvir ölçülü 144Hz ekranların işlənməsi, 3200MHz tezlikli 16GB LPDDR5 operativ yaddaşın quraşdırılması mümkündür. Əlavə olaraq WiFi 6E (2.9Gbps), Bluetooth 5.2, Quick Charge 4 Plus tipli detalları da özündə birləşdirir.
