Qualcomm şirkəti müxtəlif seqmentlər üzrə çipsetlərini Gen 1 seriyasına keçirməyə davam edir. Belə ki, 8 Gen 1 seriyası və 7 Gen 1 seriyasından sonra növbə 6 Gen 1 seriyasına çatıb. Snapdragon 6 Gen 1 barədə məlumatlar tanınmış insayder Evan Blass tərəfindən paylaşılıb. Beleləliklə, çipsetin bəzi texniki xüsusiyyətləri rəsmi təqdimatdan əvvəl ortaya çıxıb. Məlum olan texniki xüsusiyyətlər isə bir şeyə işarə edir ki, Gen 1 seriyasına aid olan bütün çipsetlər minimum 4nm texnoloji prosesə əsaslanacaq.
Snapdragon 6 Gen 1 çipseti də 4nm istehsal prosesi ilə hazırlanıb!
SM6450 model nömrəsinə sahib Snapdragon 6 Gen 1 çipseti paylaşılmış texniki xüsusiyyətlər səhifəsindəki görüntülərə əsasən, 4nm texnoloji prosesə sahibdir. İstehsal prosesinin TSMC, yoxsa Samsung əsaslı olduğu məlum deyil. Lakin orta seqmentdə 4nm TSMC istehsal prosesi çox vaxt istifadə edilmədiyi üçün, böyük bir ehtimalla 7 Gen 1 çipsetindəki olduğu kimi 6 Gen 1 də Samsung şirkətinin texnoloji prosesini mənimsəyir.
Paylaşılmış görüntü bizə CPU və GPU detalları bağlı çox az informasiya verir. Lakin diqqətli analiz etdikdə Snapdragon 695 5G çipseti kimi ən yüksək nüvənin 2.2GHz tezlikdə işlədiyini görürük. Buna görə də böyük bir ehtimalla Cortex-A78 əsaslı 2 ədəd Kryo 660 Gold nüvəsi 2.2GHz tezlikdə, 6 ədəd Cortex-A55 əsaslı Kryo 660 Silver nüvəsi 1.7GHz tezlikdə işləyəcək. Lakin çipset rəsmiləşdikdən sonra bəzi detallarda fərqlilik görə bilərik. Eyni zamanda Adreno qrafiki çipi də müəyyən yüksəltmələr əldə edib.
Diqqətimizi çəkən əsas nüans görüntü emalı çipinin (ISP) təkmilləşdirilməsidir. Sələfi olan Snapdragon 695 5G sahib olduğu ISP ilə smartfonların kamera performansını əhəmiyyətli dərəcədə aşağı salırdı. Təsəvvür edin ki, bu çipsetin zəif emal gücü video qeydlər zamanı smartfonların yalnız 1080P keyfiyyətdə 30FPS ilə limitlənməsini məcburi edirdi. Lakin Snapdragon 6 Gen 1 yeni nəsil Spectra görüntü emalı çipi ilə bu problemin öhdəsindən gəlməlidir. Yəni bu çipsetin sahib olduğu cihazların 4K keyfiyyətdə 30FPS olmaqla video qeydlər etməyi bacaracağı gözlənilir.
Bağlantı texnologiyaları və yaddaş həlləri cəhətdən də ciddi təkmilləşdirmələr mövcuddur. Bu çipset artıq 2750MHZ tezlikli LPDDR5 operativ yaddaş texnologiyasını dəstəkləyir. Eyni zamanda WiFi 6E və 5G mmWave texnologiyalarının olduğu Snapdragon X62 5G, Qualcomm FastConnect 6700 modemlərinə sahibdir.
Snapdragon 6 Gen 1 çipsetinin yaxın vaxtlarda Snapdragon 8 Gen 2 ilə birlikdə bazara çıxarılacağı gözlənilir. Ola bilsin ki, Qualcomm şirkəti Snapdragon 8 Gen 2 təqdimatına qədər gözləməyib bu çipseti daha yaxın həftələrdə hansısa smartfon üzərində də bazara çıxara bilər.
