Səudiyyə Ərəbistanı bütün elektron cihazların şarj portlarını USB-C üzərində standartlaşdıracaq qanunu elan etdi. Artıq bütün cihazlarda USB-C məcburiyyəti təkcə Avropadan gəlməyəcək. Bu istiqamətdə birinci mərhələ 2025-ci il yanvarın 1-də başlayacaq. Hökumət sözçüləri bunun istifadəçi təcrübəsini yaxşılaşdırmaq, xərcləri və elektron tullantıları azaltmaq, eləcə də yüksək keyfiyyətli məlumat ötürülməsini təmin etmək məqsədi daşıdığını bildiriblər.
Qərar Səudiyyənin Standartlar, Metrologiya və Keyfiyyət Təşkilatı və Rabitə, Kosmik və Texnologiya Komissiyası tərəfindən qəbul edilib. Birinci mərhələ mobil telefonlar və qulaqlıqlar, klaviaturalar, dinamiklər, marşrutlaşdırıcılar kimi elektron cihazlar üçündür. İkinci mərhələ 2026-cı il aprelin 1-dən noutbuklara və portativ kompüterlərə şamil ediləcək. Səudiyyə Ərəbistanı təşkilatının hesablamalarına görə, istehlakçılar USB-C texnologiyasına keçidlə 170 milyon SAR-a (təxminən 45 milyon dollar) qənaət edə bilərlər. Eyni zamanda bu addım 1 il ərzində şarj cihazlarının istifadəsini 2,2 milyon ədəddən çox azaldacaq.
Xatırladaq ki, Avropa Birliyinin başlatdığı bu qərar yavaş-yavaş digər dünya ölkələrində də yayılmağa başlayır. Məşhur istehsalçı Apple belə smartfonlarını bu ildən USB-C ilə şarj olacaq şəkildə təkmilləşdirib. Yaxın gələcək sözün əsl mənasında Type-C texnologiyasının əlindədir.
