Samsung şirkəti texnologiya sahəsində müxtəlif sektorlarda fəaliyyət göstərir. Araşdırsanız xırda komponentlərdən tutmuş, ölçüsü metrlərlə ölçülən böyük avadanlıqlara qədər firmanın istehsalatından çıxdığını görərsiniz. Belə ki, Samsung eyni zamanda dünyanın ən keyfiyyətli ekran paneli təminatçılarından biridir. Buna görə də elə şirkətin özünun istehsal etdiyi televizorlar mükəmməl ekranları ilə çox yaxşı istifadəçi təcrübəsi yaşadırlar. Lakin bu günün tələbləri sadəcə texniki cəhətdən ən yaxşıya sahib olmaqla bitmir. İstehsal edilmiş televizor nə qədər əla olsa da proqram təminatı cəhətdən alıcıya zəngin xüsusiyyətlər verməsi vacibdir. Samsung mühəndisləri də belə düşünüb ki, bazarda televizor sektoru üçün rəqabətcil yeniliklərdən biri ötən gün təqdim edilib. Bulud texnologiyalarından yararlanan ağıllı Samsung televizorlar Samsung Gaming Hub yeniləməsi ilə oyun konsollarına çevrilir.
Televizorunuzda Samsung Gaming Hub varsa oyun konsoluna ehtiyac qalmayacaq
Bulud texnologiyası ilə işləyən oyun servislərinin nə olduğunu bilmirsinizsə ilk olaraq qısa formada bunu izah edək. Bu texnologiya tətbiq üzərindən NVIDIA, Google, Microsoft və.s kimi şirkətlərin serverlərinə bağlanaraq oyunu bir növ onların serverlərində oynamağa əsaslanır. Yəni cihazınızdakı tətbiq ilə uzaqdakı “kompüteri” idarə edirsiniz. O isə sizə oyunun “videosunu” ötürür. Ona görə də cihazda yüksək performansa, emal gücünə sahib prosessorun, qrafik kartının və.s olmağına ehtiyac qalmır. Sadəcə yüksək sürətli internet bağlantısının olması lazım gəlir. Əgər internetiniz sürətlidirsə kifayət qədər yetərli oyun təcrübəsi yaşaya bilərsiniz. Samsung isə bu texnologiyanı Samsung Gaming Hub ilə televizorlara gətirir.
2022-ci ildə istehsal edilmiş ağıllı televizorlara və 2022 Smart Monitor seriyasına gələn yenilik ilə tanınmış bir çox bulud texnologiyalı oyun servisi televizorlara inteqrasiya edilir. İstifadəçilər NVIDIA GeForce NOW, Xbox, Google Stadia, Utomik, Amazon Luna kimi öz sahəsində lider platformaları televizorlarında işlədə biləcəklər. Sizə lazım olan tək şey oyunları oynamaq üçün kontrollerdir. Samsung şirkəti əksər kontrollerəri bluetooth bağlantısı ilə televizorlara qoşmağı dəstəkləyir. Ona görə də xüsusi bir kontroller almağınıza ehtiyac yoxdur. Büdcənizə uyğun alacağınız hansısa cihaz oyunları oynamağınıza bəs edəcək.
Təəssüf ki, Samsung Gaming Hub yeniləməsinin gələcəkdə ölkəmizdə işləyib-işləməyəcəyi barədə məlumatlı deyilik. Lakin verilmiş siyahıda hələ ki, Azərbaycanın mövcud olmadığını qeyd edə bilərik. Əgər oyun oynamağı sevirsinizsə, bir-birindən güclü oyun notbukları və aksesuarları üçün Gamenote-u ziyarət etməyi unutmayın.
