Ötən illərdə flaqman smartfonlarda ISOCELL HP, GN, GM seriyası kimi Samsung istehsalı kameraları tez-tez görürdük. Xüsusilə smartfonlarda 108MP kimi yüksək təsvir ölçüsü trendi başladıqdan sonra Xiaomi başda olmaqla bir çox şirkət ISOCELL sensorlarına yönəlməyə başladı. Lakin çox təəssüf ki, son 1 il ərzində “MP” trendi öz yerini əsl lazım olan detala, sensor ölçüsünə buraxıb. Yəni şirkətlər flaqman cihazlarında yüksək təsvir ölçülü kamera sensorları yerinə, sensor ölçüsü (fiziki ölçü) baxımından daha güclü alternativlərə yönəlirlər. Təbii ki, bu yerdə Sony şikrəti çox güclü bir oyunçuya çevrilir. Ötən il təqdim olunan 1 düymlük IMX989 50MP kamera sensoru flaqman smartfonlar üçün elə bir seçimə çevrildi ki, bütün premium brendlərin 2023-cü ildə belə diqqət mərkəzində bu sensor olacaq.
Nəticədə Samsung ISOCELL kamera sensorları populyarlığını itirməyə davam edir
The Elec resursu tərəfindən verilən məlumata görə sadəcə ötən ilin üçüncü rübündə Sony istehsal kamera sensorları bazarın 51,6%-lik hissəsini ələ alaraq lider olub. Samsung eyni dövrdə 15,6% ilə ikinci ən böyük kamera sensoru istehsalçısı, Omnivision isə 9,7% ilə üçüncü olub. Qəribədir ki, Omnivision hal-hazırda daha yaxşı böyümə tempinə malikdir. Ehtimallara görə bu problemin ən əsas səbəbi Samsung şirkətinin kamera sensorları cəhətdən yeni həllər ortaya çıxarmamasıdır.
2021-ci ilin ortalarında Samsung ISOCELL bazarın 29%-lik bir hissəsini ələ alarkən, Sony üçün bu rəqəm 46% təşkil edirdi. Analitiklərin fikrincə rəqəmlərin belə kəskin dəyişməsində Xiaomi markasının rolu böyükdür. Xiaomi 12 seriyası, o cümlədən Xiaomi 13 seriyası tamamilə Sony CMOS seriyası kamera sensorları ilə inkişaf etdirilib. Digər bir tərəfdən Vivo brendinin də Sony CMOS lehinə flaqman modellərini daşıması və iPhone modellərinin ötən il olan ideal satış ədədləri fərqin artmasına təsir göstərmiş ola bilər.
