Təqribən 3-4 il geri qayıtsaq smartfon istehsalında yeni dizayn həlləri üçün hər dəfə fərqli trendlər ortaya çıxırdı. Çərtikli ekran dizaynından sonra yenilik axtaran şirkətlər deşikli (nöqtəvi) selfi kamerasına keçid etmişdilər. Lakin bəzi şirkətlər ekranda heç bir əlavə elementin olmasını istəmirdilər. Əslində, həmin dövr üçün belə bir imkanın yaradılması istəkdən əlavə, müəyyən marketinq üsuluna çevrilmişdi. Ona görə də şirkətlər selfi kameralarını gizlətmək üçün “Pop-up” adlandırdığımız, gövdəyə daxil olub çıxmağı bacaran selfi kamerası texnologiyalarını seçdilər. Əks halda ekran altına yerləşdirilən kameralar baha və keyfiyyətsiz üsul olacaqdı. Lakin “Pop-up” texnologiyası da smartfonlar üçün uğurlu deyildi. Nəticədə trendə çevrildiyi 2019-cu illərdə aktiv formada tətbiq edildikdən sonra “Pop-up”, tarixin tozlu rəflərinə göndərildi.
Redmi brendinin rəhbəri Lu Weibing bu texnologiyanın keçmişdə qaldığı və heç vaxt işlədilməyəcəyini bildirib
Bir vaxtlar “Mi” adının istifadə olunduğu dövrdə Mi 9T seriyasında və ya OnePlus brendinin ən məşhur OnePlus 7 Pro modelində bəlkə də “Pop-up” selfi kameralarının necə olduğunu test etmisiniz. Təbii ki, buna bənzər və hətta eyni texnologiyalar bir çox smartfonda istifadə olunub. Məsələn, məşhur Galaxy A80 modeli də önə doğru qatlanaraq arxa kameraları selfi üçün işlətməyi mümkün edirdi.
Lakin bu tip texnologiyalar smartfon istehsalını xeyli çətinləşdirirdi. Şirkətlərin çətinliklərlə bağlı söylədiyi cavablar olduqca müxtəlifdir. Belə ki, smartfonun qalınlaşması kimi sadə səbəblərdən tutmuş, açılan selfi kamerası üçün quraşdırılan mexanizmlərin cihaz daxilində çox yer tutması kimi səbəblər vardır. Ən vacib problem isə bu texnologiyanın nə büdcəvi cihazlara, nə də flaqmanlara uyğun olmasıdır. Belə ki, flaqman cihazların arxa kamera konfiqurasiyası üçün cihazın üst hissəsində olduqca geniş yer tələb olunur. Büdcəvi cihazlarda isə mühəndislik xərcləri ən aşağı səviyyəyə endirilməlidir. “Pop-up” selfi kamerası hər cihazda fərqli cür təkmilləşdirmələr tələb etdiyindən şirkətlər, yeni cihazlara bu texnologiyanı quraşdırmağı məntiqli görmürlər.
Lu Weibing də bütün bunları istinadən Redmi K20 və qlobal bazarda tanıdığınız üzrə Mi 9T seriyasında ilk dəfə işlədilmiş texnologiyanın çoxdan ləğv edildiyini açıqlayıb. Qarşıdan gələn Redmi K60 seriyasının təqdimat tədbiri ilə bağlı öndən verilən sualı cavablayan Lu Weibing, hələlik yalnız standart selfi kameralarının işlədiləcəyini qeyd edib. Ekran altı kamera texnologiyaları isə hələ bir neçə il təkmilləşmə və ümumi istifadəyə uyğun hala gələnə qədər kütləvi yayılmayacaq.
