ZTE şirkətinə məxsus Nubia brendi Red Magic seriyası oyun smartfonları ilə dünyada olduqca populyarlıq qazanıb. Lakin çox təəssüf ki, oyun smartfonlarına olan tələbatın ciddi şəkildə aşağı düşməsi şirkətlərin işini xeyli çətinləşdirir. Tələbatın az olması isə seriya istehsalından çıxan modellərin azlığına və dəyərin yüksəlməsinə səbəb olur. Buna görə də Nubia brendi ötən gün təqdim etdiyi Red Magic 8 Pro seriyası ilə tam olaraq yenilikçi bir dizaynla qarşımıza çıxıb.
Smartfonu adətən kiçik bir “monitor” kimi xəyal edən ZTE şirkəti bu oyun smartfonunda tamamilə düzbucaqlı bir gövdə və minimalistik çərçivələrə malik düzbucaqlı ekrandan istifadə edib. Selfi kamerasının da ekran altına gizlədilmiş olması kənardan baxanlar üçün cihaza futuristik bir imic qatıb.
Şəkillərdə dizaynına görə fərqlənən iki fərqli cihaz görəcəksiniz. Lakin ilk olaraq onu qeyd etmək lazımdır ki, Red Magic 8 Pro və Red Magic 8 Pro+ modelləri arasında görünüş, yaddaş və operativ yaddaş variantları xaricində heç bir fərqlilik yoxdur. Yəni gördüyünüz hər iki cihaz üçün texniki xüsusiyyətlər birə-bir eynidir.
Red Magic 8 Pro seriyası bizə nə vəd edir?
Red Magic 8 Pro seriyası öz gücünü Snapdragon 8 Gen 2 çipsetindən alır. Oyun smartfonundan danışırıqsa soyutma sistemi də yüksək səviyyədə olmalıdır. ZTE şirkəti smartfona pərli soyutma sistemi quraşdırıb və sistem 20.000 rpm sürətində işləyərək aktiv soyutmanı təmin edir. Buna baxmayaraq 3 ölçülü (3D) 2068mm³ həcmli buxar qazanlı passiv soyutma sistemi və ICE11 adı verilən soyutma texnologiyaları ilə də cihazlar gücləndirilmişdir. Snapdragon 8 Gen 2 çipsetinin yanında isə ikinci bir Red Magic R2 çipi mövcuddur ki, səs, görüntü, performans və oyunlarda effektlərin idarəsi üçün köməkçi rolunu oynayır. LPDDR5X və UFS 4.0 texnologiyaları da normal olaraq cihazlarda öz yerini tapmışdır.
Televizor kimi düzbucaqlı olan ekrana sahib Red Magic 8 seriyası BOE istehsalı 6.8 düymlük 120Hz tezlikli AMOLED panelə sahibdir. Sensor tezliyi 960Hz olub çox həssas işləsə də heyif ki, ekran FHD+ təsvir ölçüsünə malikdir. Lakin ekran altı kamera selfi kamerasına sahib olduğu üçün 2K təsvir ölçülü ekranın işlədilməsi biraz çətin ola bilərdi. P3 rəng qamutu və 1440Hz tezlikli DC Dimming (titrəməni minimuma endirir) texnologiyalarını dəstəkləyir.
Oyun smartfonları üçün üçüncü əsas bölmə isə batareya detallarıdır. Yeni Red Magic 8 Pro və Red Magic 8 Pro+ modelləri arasındakı fərqlərdən biri məhz bu hissədə yaranır. Red Magic 8 Pro+ modelində 5000 mAs həcmli və 165 Vatt sürətli şarj dəstəkləyən batareya quraşdırılıb. Red Magic 8 Pro modelində isə 6000 mAs həcmli və 80 Vatt sürətli şarj dəstəkləyən batareya mövcuddur. Görünüşünə görə hər iki cihaz arasında seçim etmək istifadəçinin özündən aslıdır. Lakin şarj sürəti daha az olsa da 1000 mAs daha böyük batareyalı Red Magic 8 Pro fikrimizcə Red Magic 8 Pro+ modelindən daha məntiqli seçim olacaq. Nəticədə 80 vatt ilə tam boşalmış batareyanı doldurmaq 35 dəqiqə çəkir, lakin istifadədə aldığınız ekran müddəti bundan xeyli artıq olacaq.
Kamera parametrləri cəhətdən Red Magic 8 seriyası çox da güclü deyil. 1/1.57 düymlük 50MP ISOCELL GN5 ilə təchiz edilmiş cihazlar, 8MP ultra-geniş bucaqlı və 2MP makro kameraları ilə tamamlanıb. Ön tərəfdə isə ekran altına yerləşdirilmiş 16MP selfi kamersı mövcuddur.
Red Magic 8 Pro modelləri ilə bağlı yerdə qalan detallar və qiyməti
Red Magic 8 Pro seriyası oyun smartfonu üçün ən vacib olan 3.5mm qulaqlıqlar və tətiklər ilə həmişəki kimi təchiz edilib. Tətiklərdən ikisi 520 Hz sensor tezlikli qeyri-fiziki, biri isə fiziki bir düymədən ibarətdir. Şəbəkə bağlantısının təkmilləşdirilməsi üçün gövdənin müxtəlif yerlərinə 9 ədəd antena quraşdırılıb.
Red Magic 8 Pro seriyasının qiyməti:
Red Magic 8 Pro modelinin 8-128GB yaddaşa malik variantı 3999 Yuan (558$), Red Magic 8 Pro+ modelinin sadə arxa qapağa və 12-256GB yaddaşa malik variantı 5199 yuan (726$), şəffaf arxa qapaqlı 12-256GB variantı isə 5399 Yuan (753$) təşkil edir.
