Amerika Səsyazma Sənayesi Assosiasiyasının məlumatına görə, ötən il ABŞ-da 43 milyon ədəd Val satılıb. Maraqlısı budur ki, ötən il ABŞ-da Val satışları CD satışından 6 milyon ədəd çox olmaqla ötməyi bacarıb. 1987-ci ildən bəri ilk dəfə ABŞ-da Val satışı CD satışından daha çox olub. Ümumiyyətlə, statistikaya nəzər saldıqda 17 ildir ki, val satışının davamlı artdığını görmək mümkündür.
Val qiymətləri CD-lərdən bir xeyli yüksək olduğundan, Val gəlirləri CD gəlirlərindən 3 dəfə çox olub. Qeyd edək ki, 2022-ci il ilə müqayisədə, ötən il CD satışları da 700 min ədəd azalıb. Fiziki media gəlirləri bütün musiqi gəlirlərinin yalnız 11%-ni təşkil edir. Spotify, Apple Music və Youtube Music kimi yayım platformaları ABŞ-da musiqi gəlirlərinin 84%-ni təşkil edir. Ümumiyyətlə müasir dövrdə Val satışları CD-ni niyə ötüb sualının cavabı isə çox sadədir.
Musiqisevərlər üçün nostalji hisslər yaratmaqla yanaşı, yüksək kolleksiya dəyərinə sahib olmasına və dinləyicilərə daha təbii və orijinal səslər təqdim etməsinə görə qramafonlarda istifadə edilən vallar populyarlıq qazanıb. Artıq bir neçə ildir ki, insanlar CD-dən istifadə etmir. Bunun əvəzinə daha etibarlı və daha kiçik həcmə sahib olan flaş kartlar istifadə olunur. Hətta CD-lər ən çox istifadə olunduğu avtomobillər belə müasir dövrdlə CD player-lər ilə təchiz olunmur.
