Kaliforniyalı ixtiraçı Peter Bevelacqua pəncərə şüşəsindən naqilsiz elektrik enerjisini ötürə bilən Power Mole adlı cihaz hazırlayıb. Qeyd edək ki, bu cihaz əsasən evin çölündəki təhlükəsizlik kameralarına, lampalara enerji verilməsi üçün nəzərdə tutulub. Power Mole iki disk formalı elementdən ibarətdir: onlardan biri (ötürücü) evin içərisindəki pəncərəyə bərkidilir, digəri (qəbuledici) çöldə quraşdırılır. Ötürücü adi ev enerji yuvasına qoşulur və qəbuledici USB vasitəsilə xarici cihaza qoşulur.
Pəncərə şüşəsindən elektrik ötürən bu cihaz sadəcə 10Vt-a qədər enerji ötürmək qabiliyyətinə malikdir. Habelə, cihaz smartfonlar üçün şarj cihazı kimi elektromaqnit induksiya prinsipi ilə işləyir. Əslində bu cihaz sadəcə pəncərə şüşəsindən deyil, digər dielektrik yəni elektrik keçirmə qabiliyyəti olmayan ağac və ya hər hansı qeyri-metal səthə də uyğun gəlir. Buradakı ən vacib detal isə səthin qalınlığının 30 mm-dən çox olmamasıdır. Onu da qeyd edək ki, ötürücü və qəbuledici arasında metal aşkar edilərsə, ötürücü avtomatik olaraq bağlanacaq.
Habelə Power Mole səmərəliliyi məsafədən asılı olaraq dəyişə bilir. Məsələn, 5 Vt enerji istehlakı olan bir kamera üçün cihazın səmərəliliyi 30 mm məsafədə 50% ilə 6 mm-dən daha az məsafədə 75% arasında dəyişir. İndi Power Mole layihəsi Kickstarter kraudfundinq platformasında yerləşdirilib. Əgər bu cür qurğular nə vaxtsa bazara çıxarılarsa ABŞ-da 59 dollara qəbuledicilər dəsti, elektrik kabeli olan ötürücü və şüşəyə yapışdırmaq üçün iki stiker almaq olacaq. Qeyd edək ki, layihə uğurlu hesab olunarsa cihaz beynəlxalq bazarda da satışa çıxarıla bilər.
