Elə ötən gün ABŞ ilə Huawei arasında baş verən yeni gərginlik barədə məlumat vermişdik. İndi isə Çinli insayderlərdən Huawei şirkətinin smartfon sektoru ilə əlaqədar təəccübləndirən iddialar gəlib. Belə ki, sanksiyalara qədər Huawei şirkəti flaqman modellərində HiSilicon bölməsinin hazırladığı Kirin seriyası çipsetlər istifadə edirdi. Kirin 9000 çipseti hazırlandıqdan sonra sanksiyalar şirkətin yeni çipset inkişaf etdirməsinə imkan vermədi. Eyni zamanda TSMC-dən təmin edilən yarımkeçirici məhsullar əlçatan olmadığı üçün çipset inkişaf etdirilsə belə seriya istehsalı mümkün deyildi. Məsələn, sonuncu Kirin 9000 çipseti TSMC-nin 5nm texnoloji prosesinə əsaslanırdı. İddialara görə Huawei keçən müddət ərzində fərqli metodlar sınaqdan keçirib və Huawei P60 modelində yeni Kirin 9100 çipseti istifadə ediləcək. Qəribə olan bir şey var ki, Kirin 9100 çipsetinin 5-6 il əvvəl mövcud olan 14nm istehsal prosesi üzərinə qurulduğu bildirilir.
Kirin 9100 çipsetindəki 14nm texnoloji proses düşündüyümüzdən fərqli ola bilər
Fantastik görünən digər şey, Huawei şirkətinin 14nm istehsal prosesinin performans cəhətdən 5nm istehsal prosesinə sahib mövcud çipsetlərlə rəqabət edə biləcəyi qeydləridir. Ona görə böyük bir ehtimalla illər əvvəl mövcud olan 14nm istehsal prosesi ciddi modifikasiya dəyişikliyindən keçirilib. Bu ehtimalı qüvvətləndirən detallardan biri istehsal prosesinin 14nm 3D paketləmə olaraq yazılmasıdır.
Huawei şirkəti Kirin 9100 çipsetini 2023-cü ildə təqdim ediləcək Huawei P60 seriyasına quraşdırmağı planlaşdırır. İddiaların nə qədər doğru olub-olmadığını təxmin etmək isə həqiqətən çox çətindir. Huawei uzun müddətdir bu barədə səssiz davranır. Lakin 14nm texnoloji prosesdə sadəcə 2 milyon tranzistor olduğunu nəzərə alsaq, 5nm texnoloji proses ilə müqayisədə 7 dəfədən çox fərq var. Son nəsil 5nm çipsetlərin daxilində 15 milyona yaxın tranzistor istifadə olunur. Bəlkə də şirkət 3D paketləmə deyilən texnologiya ilə bu problemi həll etməyi bacarıb.
Texnoloji proses isə təxminlərimizə görə Çinin SMIC şirkətinə məxsusdur. Bu yaxınlarda bəzi qaynaqlar SMIC şirkətində TSMC-nin 7nm texnoloji prosesinə dair kopyalanmış komponentlərin olduğunu bildirmişdi. Lakin SMIC sanksiyalar səbəbilə 7nm istehsal prosesini hələlik seriya istehsalına keçirməyi bacarmayıb. 14nm istehsal prosesi üçün isə hansısa sanksiya, problem mövcud deyil.
Sizcə, Huawei doğurdan da bu addımı atsa uğurlu ola biləcək? Fikirlərinizi rəylərdə bizimlə bölüşə bilərsiniz.
