Avropa Birliyinin radarına bu dəfə Meta şirkəti daxil olub. Belə ki, “Instagram” və “Facebook”un uşaqların sağlamlığına mənfi təsir göstərməsi, asılılığa səbəb olması, Meta isə yetərincə iş görmədiyi üçün Avropa Birliyi rəsmi araşdırmaya başlayıb. Ümumiyyətlə, Meta çətiri altında olan Instagram və Facebook-un uşaqların sağlamlığına təsiri son vaxtlar əsas müzakirələr sırasındadır.
Avropa Birliyi (AB) Metanın sosial media platformalarından istifadə edən uşaqların həm ruhi, həm də fiziki sağlamlığını qorumaq üçün kifayət qədər iş görmədiyindən narahat olaraq, Meta şirkətinə qarşı rəsmi araşdırma başladıb. Beləliklə, Avropa Komissiyasının açıqladığı araşdırma çərçivəsində Meta-nın Rəqəmsal Xidmətlər Aktı (DSA) çərçivəsindəki qaydalara uyğun olub-olmadığı qiymətləndiriləcək. Bundan əlavə, Komissiya qeyd edir ki, Facebook və Instagram-ın istifadəçi interfeysi və alqoritmləri uşaqlarda asılılıq yarada bilər.
Araşdırma çətçivəsində Meta-nın yetkinlik yaşına çatmayanların uyğun olmayan məzmuna daxil olmasının qarşısını almaq üçün lazımi tədbirlər görmədiyini və yaş yoxlama vasitələrinin kifayət qədər olmadığını bildirilib. Həmçinin, Meta-nın tövsiyə sistemləri və standart məxfilik parametrlərinin uşaqlar üçün adekvat qorunma təmin edib-etməməsi də araşdırma çərçivəsində qiymətləndiriləcək mövzular arasındadır. Hələlik bu araşdırma üçün yekun tarix açıqlanmayıb. Avropa Birliyinin yüksək səlahiyyətli rəsmisi Thierry Breton, bildirib ki, “Bu gün Instagram və Facebook-un çətir şirkəti Meta-ya qarşı rəsmi DSA (Rəqəmsal Xidmətlər Qanunu) araşdırması açırıq. Biz əmin deyilik ki, Meta öz Facebook və Instagram platformalarında gənc avropalıların fiziki və psixi sağlamlığı üçün mənfi riskləri azaltmaq üçün DSA öhdəliklərinə əməl etmək üçün kifayət qədər işlər görüb”. Daha əvvəl isə AB TikTok-a qarşı eyni addımı atmışdı.
