Apple şirkəti təhlükəsizlik tərəfində daim digər brendlərdən bir addım öndə olmağa çalışır. Belə ki, texnologiya nəhəngi indiyə qədər bir çox cihazlarında Face ID və Touch ID kimi yüksək səviyyəli kilid açma sistemlərindən istifadə edirdi. İndi isə Apple Vision Pro modelini təqdim etdikdən sonra Optic ID adlı yeni kilid açma üsulunu təqdim edib.
Qeyd edək ki, Optic ID istifadəçiləri göz qişalarından tanıyır. Ümumiyyətlə hər bir insanın özünəməxsus barmaq izi olduğu kimi göz qişası və ya gəz bəbəkləri də mövcuddur. Məhz Apple şirkətinin yeni təqdim etdiyi Optic ID kilid açma üsulu da bu unikallığı istifadə edərək istifadəçilərə yeni imkanlar verir. Artıq Vision Pro istifadəçiləri yeni kilid açma üsulu ilə birlikdə Apple Pay vasitəsilə alış-veriş edə, bir çox üçüncü tərəf proqramlara daxil ola və ya həssas məlumatlarını daxil edə bilər. Həmçinin iPhone və iPad-də Face ID və Touch ID-ni dəstəkləyən proqramlar da avtomatik olaraq Optic ID-ni dəstəkləyir.
Apple bildirib ki, “Touch ID barmaq izi və Face ID sifətin tanınması ilə autentifikasiyada inqilab etdiyi kimi, Optic ID də iris (göz qişasının) tanınması ilə autentifikasiyada inqilab edib”. Optic ID, qulaqlığın sahib olduğu LED-lər və infraqırmızı kameralar ilə irisin unikallığından istifadə edərək intuitiv və təhlükəsiz autentifikasiya təmin edir. Optic ID standart olaraq hər iki gözü skan edir. Apple deyir ki, iris və göz bəbəyinin işıqlandırma şəraitindən asılı olaraq dəyişdiyini nəzərə alsaq, Optic ID hər uğurlu autentifikasiyadan sonra qeydə alınmış nümunəni yeniləyərək uyğunlaşır. Apple bütün biometrik məlumatların şifrələndiyini və heç vaxt iCloud-da və ya başqa yerdə saxlanmamasını da təmin edir.
