Texnologiya nəhəngi olan Apple şirkəti yeni Macbook Air və Macbook Pro modelləri üçün düyməsiz klaviatura dizaynının patentini alıb. Belə ki, bu dizayn ilk dəfə 2017-ci ildə ABŞ Patent və Ticarət nişanları idarəsinə təqdim olunmuşdu. Lakin şirkət bu dizaynı ötən gün patentləşdirib. Yeni düyməsiz klaviatura dizaynını 2024-cü ildə yeni Macbook modellərində görə bilərik. Yeni patentin dizaynında fiziki düymələrin multitouch sensor sistemli ekran paneli ilə əvəz olunması təsvir olunur.
Apple şirkətinin düyməsiz klaviatura dizaynı
Düyməsiz klaviatura patentinin ilkin görüntülərinə əsasən demək olar ki, yeni Macbook modelləri Dell şirkətinin 2 ekranlı noutbuklarına bənzəyəcək. Həmçinin ilkin görüntülərə əsasən düyməsiz klaviaturanın ekran paneli ilə əvəz olunduğu görünür. Bu paneldə yalnız klaviatura deyil həm də bir neçə qısayollardan ibarət alətlər paneli olacaq. Belə ki, biz bu alətlət panelini Macbook Pro modellərindən tanıyırıq. Yeni düyməsiz klaviaturanın iş prinsipi ondan ibarət olacaq ki, istifadəçi panelə barmağını sıxdıqda panel sensorlar vasitəsi ilə onun hansı hərfi daxil etmək istədiyini anlayacaq. Əlavə olaraq qeyd edək ki, yeni təmassız klaviatura iPhone və iPad modellərində gördüyümüz Haptic Touch texnologiyasından istifadə edəcək.
Apple düyməsiz klaviatura dizaynı ilə bağlı patenti təqdim edərkən, fiziki düymələrin faydasız olduğunu qeyd etmişdi. 2018-ci ildən bəri fiziki klaviaturanı ləğv etməyinin digər yollarını axtaran şirkət nəhayət ötən gün düyməsiz klaviatura dizaynını patentləşdirə bilib. Bəzi analtiklərin fikrinə görə klaviaturasız Macbook modellərini 2024-cü ildən etibarən görə bilərik. Həmçinin onlar bu dizaynın Macbok ailəsinin yeni təqdim olunacaq Ultra modelində də istifadə olunacağını iddia edirlər. Lakin bunlar sadəcə iddiadır və yeni dizaynın istifadə olunub-olunmayacağı bilmək mümkün deyil.
