Məlumdur ki, VR istehsalçıları məhsullarının reallığı daha çox yansıtması üzərində işləyirlər. Beləliklə bir tədqiqat qrupu bu məqsədlə oyun oynayan zaman həqiqətəndə sizə oyunu bütün reallığı ilə yaşada biləcək virtual reallıq aksesuarı hazırlayıb. Yaxın zamanda Salzburg Tətbiqi Elmlər Universitetinin bu tədqiqat qrupu üzvləri sözü gedən AirRes Mask məhsulunu təqdim etdi. Məhsul Oculus Quest 2 virtual reallıq dəbilqəsini daha da maraqlı edəcək. Şəkildən də gördüyünüz kimi bu yeni məhsul digər virtual reallıq məhsullarından tamamilə fərqli görüntüyə sahibdir və istifadəçinin nəfəs alıb verişinə nəzarət edə bilir.
Virtual reallıq aksesuarı AirRes nə vəd edir?
Oyun zamanı nəfəsinizə nəzarət edən aksesuar hansısa musiqi alətini üfürən zaman və ya silah oyunu oynayan zaman atışdan əvvəl nəfəsinizi tənzimləməyə imkan vermək kimi bir çox xüsusiyyətə malikdir. Bundan əlavə AirRes sizə boğulma hissinidə realmış kimi yaşada bilir. Səbəbi isə bu virtual reallıq aksesuarının yarım üzlü respirator, sensor və müqavimət diski ilə təchiz edilməsidir. Tədqiqat qrupunun məhsulu təqdim etmək məqsədi ilə hazırladığı videoda AirRes aksesuarı ilə nələr etməyin mümkün olduğunu görə bilirik.
AirRes ilə nələr etmək mümkündür?
Videodakı nümunələrdən birində qısa zamanda yanğın baş verir və virtual məkanınıza tüstü dolur. AirRes Mask-da bu hissi simulyasiya etmək üçün nəfəsinizi məhdudlaşdırmaqla virtual xarakterinizin dözümlülüyünü azaldır. Yəni cihaz real həyat şərtlərini daha yaxşı simulyasıya etmək üçün istifadəçinin stress səviyyəsini artırır. Bu da sizə olduqca real hislər yaşadır. Yanğın söndürüldükdən sonra isə maska yenidən nəfəs axınınızı bərpa edir. Başqa bir nümunədə nəfəsinizlə harmonika alətini üfürərək səslər çıxarmağın mümkün olduğu nümayiş etdirilir. Digər bir nümunədə isə nəfəsinizlə tortun üzərindəki şamları belə üfürərək söndürə biləcəyiniz göstərilir. Olduqca maraqlı və həyəcan verici olsa da hələ eksperimental məhsul olduğundan bu virtual reallıq aksesuarı AirRes Maskın yaxın zamanda satışa çıxması gözlənilmir.
Xatırladaq ki, vitrual reallıq tamaşaçını ekran arxasındakı xəyali dünyaya aparmaq məqsədilə vizual və səs effektlərini təmin edən kompüter sistemləridir. İstifadəçiləri xəyali dünyaya daha çox bağlamaq istəyən VR istehsalçılarının təqdim edəcəyi yeni məhsullardan saytımızı ziyarət edərək xəbərdar ola bilərsiniz.
