ABŞ Konqresinin Nümayəndələr Palatası Çin mənşəli telekommunikasiya avadanlıqlarının ölkə infrastrukturundan çıxarılmasına səs verəcək. Qeyd edək ki, bu məqsədlə təxminən 3 milyard dollar xərclənəcək.
ABŞ Nümayəndələr Palatası gələn həftə Çin telekommunikasiya avadanlıqlarının Amerika simsiz şəbəkələrindən çıxarılması üçün 3 milyard dollara yaxın vəsaitin ayrılmasını nəzərdə tutan illik müdafiə qanun layihəsinə səs verəcək. ABŞ, Çin texnologiyalarını ölkənin milli təhlükəsizliyi üçün bir təhlükə hesab edir. 1800 səhifəlik layihə mətninə Çinə yönəlmiş digər maddələr də daxildir. Bunlara Çinin ABŞ-ın milli təhlükəsizlik qaydalarından yayınma səyləri haqqında hesabat tələbi və Çinin biotexnoloji imkanlarının mövcud vəziyyətinin kəşfiyyat tərəfindən qiymətləndirilməsi daxildir.
ABŞ-ın Federal Rabitə Komissiyası (FCC) Çinin Huawei və ZTE kimi telekommunikasiya şirkətlərinə məxsus avadanlıqların ABŞ infrastrukturundan çıxarılmasının dəyərinin 4,98 milyard dollara çatacağını təxmin edir. Lakin Konqres əvvəllər bu “sök və dəyişdir” proqramı üçün cəmi 1,9 milyard dollar ayırmışdı. Yeni qanun layihəsi FCC tərəfindən bəyan edilən 3,08 milyard dollarlıq büdcə kəsirini bağlamaq məqsədi daşıyır. Qeyd edək ki, Huawei və ZTE 5G infrastrukturu üzrə aparıcı şirkətlər sırasındadır. Birləşmiş Ştatlar uzun müddətdir Huawei və digər Çin telekommunikasiya şirkətlərinə təhlükəsizlik riski kimi baxır və müttəfiqlərini bu cür avadanlıqları şəbəkələrindən çıxarmağa çağırıb. 2019-cu ildə FCC tərəfindən qəbul edilən qərarla federal subsidiyalar alan telekommunikasiya operatorlarından Çin mənşəli avadanlıqları şəbəkələrindən çıxarmaq tələb olunub.
