Son dövrlərdə texnologiya inkişaf etdikcə, internetdə hakerlərin sayı artmağa başlayıb. Belə ki, hakerlər müxtəlif şifrələri əldə edərək insanların şəxsi məlumatlarını ələ keçirir və internetə sızdırırlar. İndi isə məlum olub ki, bir haker forumundan 10 milyard sızdırılmış şifrə dərc olunub. Bu isə tarixin ən böyük şifrə bazası hesab olunur. Mütəxəssislər bütün təhlükəsizlik tədbirlərini görməyi tövsiyə edirlər.
“rockyou2024.txt” adlı fayl iyulun 4-də “ObamaCare” istifadəçisi tərəfindən haker forumlarının birində dərc edilib və hazırda ciddi təhlükə yaradır. Faylda tam olaraq 9.948.575.739 yəni təxminən 10 milyard sızdırılmış şifrə mövcuddur. Faylı yerləşdirən istifadəçinin dediyinə görə, verilənlər bazasında son bir neçə ildəki parolların geniş çeşidi var. Buna görə də, təcavüzkarların onlardan istifadə etmə ehtimalı yüksəkdir. Mütəxəssislər bildirirlər ki, təcavüzkarlar Brute Force, yəni sınaq və səhv metodundan istifadə edərək hesabları sındırmaq üçün verilənlər bazasından istifadə edə bilərlər.
Hücumun qurbanından birinə çevrilməmək üçün hər bir xidmət üçün mürəkkəb və unikal parollardan, həmçinin iki faktorlu autentifikasiyadan və digər onlayn müdafiə mexanizmlərindən istifadə etmək tövsiyə olunur. Bu hadisələri nəzərə alaraq, Cybernews ekspertləri istifadəçilərə aşağıdakı təhlükəsizlik tədbirlərini görməyi tövsiyə edir:
- Bütün vacib hesabların parollarını dərhal dəyişdirin
- Hər bir xidmət üçün mürəkkəb, unikal parollardan istifadə edin
- Mümkünsə, iki faktorlu autentifikasiyanı aktivləşdirin
- Şübhəli fəaliyyət üçün hesablarınızı müntəzəm olaraq yoxlayın
