Son dövrlərdə bir çox texnologiya nəhəngi robotlar üzərində çalışsa da, Xiaomi bu dəfə də möhtəşəm iş bacarıb. Belə ki, Çinli nəhəng bu gün Mix Fold 3, Pad 6 Max, Smart Band 8 Pro kimi modelləri ilə yanaşı yeni nəsil robot it olan Xiaomi CyberDog 2 robotunu təqdim edib. Yeni nəsil robot həm dizayn, həm də performans tərəfində sələfindən daha üstündür. Bu dəfə Xiaomi həqiqətən də robotunu itə bənzədə bilib. Xatırladaq ki, şirkət ilk dəfə 2021-ci ildə CyberDog adlı robot itini təqdim etmişdi. Lakin bu robotun görünüşü itdən daha çox metal yığınına bənzəyirdi.
Yeni nəsil robot it olan Xiaomi CyberDog 2 həm hərəkətləri, həm də görünüşü ilə itə çox bənzəyir. Məhz bu xüsusiyyətlər də robotu tədbirin ən diqqət çəkən məhsullarından biri etdi. Süni intellektə sahib olan bu robot it 8.9 kq ağırlığa sahibdir. Həmçinin robot yeni nəsil mühərrikləri vasitəsi ilə tam sərbəst hərəkət edə bilir. Xiaomi öz açıqlamasında bildirib ki, yeni robot bir çox sensor və kameradan məlumatları əldə edərək həssas hərəkətlər edə bilir. Hətta robot kiçik yaşlı uşaqlar üçün də tamamilə təhlükəsizdir. Şirkətin baş icraçı direktoru Lei Juna görə robotun həssas hərəkətləri uşaqların zədələnməsinin qarşısını alır.
Futuristik görünüşə sahib olan bu robot iti bir çox məqsədlər üzrə öyrədilə yəni proqramlaşdırıla bilər. Onu da qeyd etmək lazımdır ki, 36 sm hündürlükdə olan robotun satış qiyməti 1800 dollar civarında olacaq. Hələlik onun tam qiyməti məlum deyil. Bundan əlavə robot yerə düşərsə tam sərbəst ayağa qalxa bilir, skeytboard sürə bilir. Həmçinin robot mikrofonları vasitəsi ilə ətraf mühitdə baş verənləri başa düşə bilir.
