Xiaomi, 27 oktybarda Redmi Note 12 seriyasının təqdimat tədbirində yeni Book Air 13 noutbukunu da təqdim edəcəyini təsdiqləyib. Məhz bundan sonra Çinin ən böyük alış-veriş saytı olan JD.com üzərindən yeni modellə bağlı bəzi detallar paylaşılıb.
Noutbukun əsas xüsusiyyətləri bölməsində cihazın 2880 x 1800 piksel təsvir ölçüsünə və 16:10 ekran nisbətinə malik 13,3 düymlük OLED sensor ekranla təchiz ediləcəyi bildirilir. Lakin sensor ekranın tezliyi sadəcə 60Hz olaraq göstərilib. Qeydlərə görə Xiaomi Book Air 13, 12-ci nəsil Intel Core-i5 və ya Core-i7 prosessorları ilə təchiz edilməsidir. Eyni zamanda 16 GB LPDDR5 tipi operativ yaddaş və 512 GB daxili yaddaş ilə təmin olunacaq.
Noutbukun ən cəlbedici xüsusiyyəti isə onun ultra nazik olmasıdır. Belə ki, noutbuk cəmi 12 mm qalınlığa və 1.2 kq ağırlığa malik olacaq. Noutbukun nazik və yüngül olması onun istənilən yerdə istifadəsini asanlaşdırır. Noutbukun klaviaturasının işıqlandırmaya sahib olub-olmaması barədə məlumat verilməyib. Cihazın digər xüsusiyyətlərinə Wi-Fi 6E və Bluetooth 5.2 bağlatısını dəstəkləməsi, həmçinin iki Thunderbolt portu ilə təchiz olunması daxildir.
Yeni noutbukun sağ tərəfində həmçinin biometrik təhlükəsizlik üçün barmaq izi sensoru da olacaq. Batareyaya gəldikdə isə onun həcmi barədə məlumat verilməyib. Lakin 65 Vatt sürətli şarj dəstəyinin olması gözlənilir. Noutbukla bağlı əlavə detalları, noutbukun canlı görüntülərini və qiymətini sabah keçiriləcək böyük tədbirdən sonra öyrənə biləcəyik.
