Apple şirkətinin yeni Mac Pro modeli haqqında bir neçə məlumat ortaya çıxıb. Belə ki, Bloomberg-dən olan Mark Qurmanın sözlərinə görə, Apple gələn il yüksək səviyyəli Mac Pro modelini rəsmi olaraq təqdim edəcək. Qurman onu da bildirir ki, Mac Pro hələ buraxılmamış M2 Max prosessorundan qat-qat güclü versiyaya sahib olacaq. Qurman Power On bülletenində yeni Mac Pro-nun buraxılmamış M2 Max-dan “ən azı iki və ya dörd dəfə daha güclü” prosessor seçimləri ilə gələcəyini bildirir. Bu prosessorların M2 Ultra və M2 Extreme adlanacağı da deyilir.
M2 Ultra və M2 Extreme prosessorlarının xüsusiyyətləri
Yeni Apple Mac Pro M2 Ultra və Extreme prosessorları ilə təchiz ediləcək. M2 Ultra-nın 76 GPU və 24 CPU nüvəsinə və 256 GB yaddaşa sahib olacağı gözlənilir. Daha güclü M2 Extreme prosessorunun isə 152 GPU və 48 CPU nüvəsinə sahib olacağı gözlənilir. Müqayisə üçün qeyd edək ki, standart M2 prosessoru 8 CPU və 10 GPU nüvəsinə sahibdir. Hələ satışa çıxarılmayan M2 Max-ın isə 12 CPU və 38 GPU nüvəsinə sahib olduğu bildirilir.
Xatırladaq ki, Apple Mac Pro sonuncu dəfə 2019-cu ildə 5,999 dollara satışa çıxarmışdı. Ona görə yeni Mac Pro bu qiymətə oxşar və ya daha yüksək ola bilər. Bununla belə, növbəti Mac Pro modelinin təqdimatına qədər M2 Pro və M2 Max prosessorları ilə təchiz olunmuş yeni 14 və 16 düymlük MacBook Pro, M2 prosessorlu Mac Mini, MacBook Air və 13 düymlük MacBook Pro modelləri satışda olacaq.
