Xiaomi şirkətinin hazırlıq mərhələsində olan smartfonlarının təqdimatdan həftələr, hətta aylar əvvəl sızdırılması adi hala çevrilib. İndi isə gələn ayın sonunda təqdim olunması gözlənilən smartfonun xüsusiyyətləri barədə məlumat ortaya çıxıb. Belə ki, OnLeaks ləqəbli insayder tərəfindən Xiaomi 13 Pro modelinə aid olduğu iddia edilən render görüntüləri və həmçinin smartfonun xüsusiyyətləri paylaşılıb.
Xiaomi 13 Pro smartfonunun xüsusiyyətləri
Smartfonun arxa tərəfinə nəzər saldıqda 3 kamera sensorunun olduğunu görmək mümkündür. Belə ki, bu 3 kamera sensorunun hər birinin 50MP olacağı iddia olunur. Smartfonun ön hissəsində yerləşən selfie kamerası isə 32MP olacaq. Smartfon bu kameralar ilə 8K UHD videolar çəkə viləcək. Həmçinin bu videolar Gyro EIS funksiyası ilə daha sabit və keyfiyyətli görüntü əldə edə biləcək.
Görüntüləri sızdırılan məlumata görə Xiaomi 13 Pro modeli 6.7 düymlük 1440×3200 təsvir ölçülü AMOLED ekran panelinə sahib olacaq. Həmçinin ekran paneli naməlum səviyyəli Gorilla Glass ilə qorunur. İnsayderin iddiasına görə, smartfon Snapdragon 8 Gen 2 çipseti ilə təchiz olunacaq. Batareya tərəfinə nəzər saldıqda isə bizi Li-Po əsaslı 4800 mAs batareya qarşılayır. Smartfon 120 Vatt sürətli şarj həmçinin 50 Vatt naqilsiz şarj dəstəkləyəcək.
Xiaomi 13 Pro ilə birlikdə Xiaomi 13 render görüntüləri də paylaşılıb!
Xiaomi 13 Pro modelindən fərqli olaraq Xiaomi 13 modeli render görüntülərinə görə iPhone 14 seriyasına bənzəyəcək. Hətta öndən Nothing Phone (1) modelini də xatırladır. Çünki, simmetrik çərçivələrə malik AMOLED ekran paneli işlədilib. Eyni zamanda gövdəsi olduqca kəskin dizayna malikdir. Render görüntülərinə əsasən, kamera dizaynı Xiaomi 13 Pro ilə eynidir. Lakin kameralarla bağlı dəqiq detallar məlum deyil. Ekran panelinin 6,2 düym olduğunu da ayrıca qeyd etmək lazımdır ki, cihaz olduqca kompakt olacaq. Əlavə olaraq qeyd edək ki, smartfonların təqdimat tarixinin 30 dekabr olduğu deyilir. Smartfonların qiyməti barədə isə heç bir məlumat sızdırılmayıb.
