Ötən ay Xiaomi şirkəti özünün flaqman Xiaomi 13 seriyasını Çində təqdim etmişdi. Həmişəki kimi qlobal bazar təqdimatı bir neçə ay sonraya saxlanılan flaqman cihazların nə vaxt və harada tanıdılacağı məlum olub. Belə ki, sızdırılan posterlərə istinadən Xiaomi 13 seriyası 27 fevral – 2 mart tarixləri arasında Barselonada keçiriləcək MWC 2023 sərgisində qlobal bazara debüt edəcək. İlkin ehtimallara görə sərgi timsalında Xiaomi 13, Xiaomi 13 Pro və Xiaomi 13 Lite modelləri qarşımıza çıxarılacaq. Eyni zamanda bir çox yeni ağıllı ev əşyaları, aksesuarlar və texnoloji məhsullar da sərgi boyunca Xiaomi stendlərində yerini alacaq. Xiaomi şirkətinin MWC 2023 sərgisində qlobal bazar üçün ən diqqət çəkəcək smartfonu isə Xiaomi 13 Lite olmalıdır. Bəziləri Xiaomi 13 Ultra modelinin də çıxarıla biləcəyini qeyd etsə də, belə bir cihazın mövcudluğuna dair heç bir informasiya yoxdur.
Xiaomi 13 Lite modelinə gəldikdə, bu cihaz ötən gün Google Play Console üzərində qeydiyyata alınarkən görülüb. Texniki cəhətdən birə-bir Xiaomi Civi 2 modelinin xüsusiyyətlərini daşıyan Xiaomi 13 Lite modeli Snapdragon 7 Gen 1 çipsetindən öz gücünü alır. Həmin smartfonun ən diqqət çəkən xüsusiyyəti isə üst seqmentə bənzər dizaynı və kapsul görünüşlü selfi kamerasıdır. Xatırlayırsınızsa, “dinamik ada” yeniliyini gördüyümüz vaxtdan 2 həftə sonra Xiaomi Civi 2 ona bənzər selfi kamerası ilə populyarlıq qazanmışdı. Cihazların texniki xüsusiyyətləri və görünüşlüəri barədə isə Xiaomi 13 seriyasının qlobal bazar təqdimatını gözləmək lazım deyil. Saytımızdan həm Xiaomi 13 seriyasının, həm Xiaomi Civi 2 (Xiaomi 13 Lite) modelinin Çində baş tutan təqdimat məqalələri ilə tanış ola bilərsiniz.
