Beləliklə, bu həftə 2022-ci ilin sonuncu ayına daxil oluruq. Dekabr ayı isə bir çox smartfon brendi üçün yeni flaqmanların təqdimatının başlanğıcı deməkdir. Məhz dekabr ayından başlayaq yaz aylarına qədər tez-tez yeni modellərin təqdimatını görəcəyik. Dekabr ayının ilk qonağı isə məhz Xiaomi 13 seriyası olacaq. Şirkətin bu gün verdiyi məlumata görə Xiaomi 13 seriyası 1 dekabr tarixində təqdim ediləcək. Təqdimat tarixinin açıqlanmasının ardıyca isə smartfonlar barədə bəzi tizer görüntüləri və rəsmi məlumatlar paylaşılıb. Təqdimatdan sonra sizlərə detallı məqalə hazırlayacağıq. Lakin gəlin bu xəbərimizdə təqdimat tarixinin fonunda bəzi rəsmiləşən detallara nəzər salaq.
Xiaomi 13 seriyası modellərin hər biri IP68 sertifikatına malik olacaq
Bəli, Xiaomi 13 seriyasından başlamaqla şirkət flaqmanlarını IP68 standartına su və toza qarşı qoruyacaq. Xüsusilə Xiaomi 11 seriyasına kamera bölməsinə dolan toz hissəciklərini bəlkə də xatırlayırsınız. Xİaomi 12 seriyasına bu tip problemlər həll olsa da, 1 dekabr tarixində debüt edəcək Xiaomi 13 seriyası bu problemlərdən tamamilə azad olacaq.
Ötən həftə smartfonların Xiaomi 14 olaraq adlandırıldığını göstərən qutuya dair görüntü də sızdırılmışdı. Şirkət paylaşdığı rəsmi posterlərdə bunu inkar edib. Yəni yeni smartfonlar elə Xiaomi 12 seriyasının davamı kimi Xiaomi 13 olaraq qarşımıza çıxacaq. Sadə Xiaomi 13 modeli elə rəsmi görüntülərdən də gördüyünüz kimi kəskin kənarlara sahib iPhone 14 bənzəri bir smartfon olacaq. Lakin Xiaomi şirkəti bu smartfona olduqca nazik kənar çərçivələrə malik ekran quraşdıracaq. Galaxy S22+ modelindən belə nazik çərçivələr yanlar və üstdən sadəcə 1.61 mm, çənə qismindən isə 1.81 mm olacaq. Ön tərəfdən baxdıqda kənar çərçivələri vizual olaraq tam simmetrik görünəcək.
Xiaomi 13 Pro isə olduqca qəribə bir dizayna malikdir. Belə ki, smartfonun ekranı qıvrımlı olsa da kənarları render görüntüsən də gördüyünüz kimi düz və kəskindir. Nəticədə tam anlamasaq da böyük bir ehtimalla ekran qıvrımı yanlara doğru yox, qabarıq şəkildə üstə doğrudur. Həm qıvrım, həm düz kənarlı smartfon istəyənlər üçün Xiaomi 13 Pro maraqlı bir seçim olacaqmış kimi görünür.
Lakin bir təəssüfləndirici məqam ola bilər ki, Xiaomi 13 modeli kompakt olmayacaq. Xiaomi 12, Xiaomi 12X kimi kompakt modellər şirkətin gözlədiyi qədər rəğbət doğurmadı. Nəticə etibarilə Xiaomi 13 modeli 6.7 düymlük standart ölçülərdə bir smartfon olmalıdır. Məlumatın nə qədər dəqiq olduğunu təqdimat zamanı öyrənəcəyik.
Təqdimat zamanı yeni nəsil Xiaomi Buds 4, Xiaomi Watch S2 və MIUI 14 interfeysi də nümayiş etdiriləcək. MIUI 14 interfeysi isə insayderlərin ilkin verdiyi məlumatlara görə olduqca təkmilləşdirilib, sadələşdirilib və çox yaxşı optimallaşdırılıb. Təbii ki, inanmaq üçün MIUI 14 interfeysini test etməliyik. Daha çox məlumat Xiaomi 13 seriyasının 1 dekabr tarixli təqdimat tədbirindən sonra məlum olacaq.
