BBK qrupu daxilində OPPO şirkətindən sonra ikinci ən güclü brend olan Vivo özünün yeni nəsil smartfonunu təqdim etməyə hazırlaşır. Belə ki, bəziləriniz nəyə görə OnePlus yox Vivo brendi ən güclüdür deyə soruşa bilərsiniz. Çünki, OnePlus brendi artıq 2 ilə yaxındır rəsmi olaraq OPPO şirkətinin alt brendinə çevrilib. O vaxtdan etibarən isə premium seqmentdə OnePlus brendi azad təkmilləşdirmələrə sahib olmadığından hal-hazırda BBK qrupu daxilində OPPO şirkətindən sonra ikinci ən böyük istehsalçı məhz Vivo hesab edilir. Beləliklə, bu gün səhər saatlarında Vivo X90 Pro+ modelinin ilk canlı görüntüsü sızdırılıb və ardıyca rəsmi görüntüsü paylaşılıb. Eyni zamanda cihazın bir çox texniki xüsusiyyəti dəqiqləşib.
Vivo X90 Pro+ modelinin kamerası üzərində 1000-dən çox insan işləyib və smartfonun kamera texnologiyaları üçün 1200-dən çox patent alınıb!
Smartfonun hər bir texniki xüsusiyyəti barədə təqdimatdan sonra dərc edəcəyimiz məqalədə detallı danışacağıq. Bu xəbərimizdə isə xüsusilə smartfonun kamera parametrlərinə nəzər yetirmək istəyirik. Şəkillərdən də gördüyünüz kimi smartfonun arxasında 4 fərqli kamera sensoru mövcuddur. Əsas kamera 1 düymlük 50MP Sony IMX989 CMOS sensoru ilə təchiz edilib ki, eynisini Xiaomi 12S Ultra modelində görmüşdük. İndiyə qədər Samsung istehsalı ISOCELL seriyası kameralardan istifadə edən Vivo brendi də artıq Sony lehinə seçim etmək qərarı alıb.
Premium flaqmanlar arasında Samsung ISOCELL kamera sensorlarından istifadə edən yeganə istehsalçı bu qərardan sonra yalnız Samsung şirkətinin özü olacaq. Təxmin etdiyiniz kimi, Samsung Galaxy S23 seriyasından söhbət gedir. Galaxy S23 seriyası xaricində premium flaqmanların hamısı Sony əsaslı kamera konfiqurasiyasını bölüşəcəklər.
Nəticə etibarilə Vivo X90 Pro+ modelində 50MP IMX989 sensorundan əlavə, 48MP Sony IMX598 ultra-geniş bucaqlı, 50MP Sony IMX578 portret, 64MP OmniVision OV64B əsaslı periskopik telefoto kameraları quraşdırılıb. Təbii ki, ZEISS imzalı kamera konfiqurasiyasında hər şey kamera sensorları ilə bitmir. Vivo şirkəti bu smartfonun kamerası üçün 1000-dən çox insanı tədqiqat və inkişaf üçün bir yerə gətirib. Üstəlik verilən məlumata görə smartfonun kamera texnologiyaları üçün 1200-dən çox patent alınıb. Ona görə də qırmızı rəngli dəri arxa qapağın üzərində ZEISS adından daha da böyük “Xtreme Imagination” imzası həkk olunub.
Smartfon Snapdragon 8 Gen 2 ilə təchiz ediləcək olsa da Vivo brendi görüntü emalı üçün özünün istehsal etdiyi Vivo V2 ISP çipindən yararlanıb. Bu çipin emal gücü tam olaraq 16.3 TOPS səviyyələrindədir ki, görüntü emalı üçün həddindəna artıq güclü bir performansdan söhbət gedir. Noyabr ayının sonunda təqdim ediləcək smartfon, həmçinin 4700 mAs batareyaya, 6.78 düymlük Samsung E6 AMOLED ekrana və.s sahibdir. Əlavə olaraq smartfonun qlobal bazarda da debüt edəcəyini bildirməkdə fayda var.
