MAB Robotics şirkəti Honey Badger adlı robot itinin artıq su altında gəzə bildiyini göstərən video yayımlayıb. Qorxu filmindən bir fraqment kimi görünən video həm valehedici, həm də ürküdücüdür.
Ümumiyyətlə, robototexnika texnologiyaları gündən-günə daha da inkişaf edir. Dörd ayaqlı “robot itlər” kimi təsvir edilən sistemlər də bu inkişafın bir parçası hesab olunurdu. İndi MAB Robotics adlı bir şirkət maraqlı bir uğur əldə etdiyini açıqlayıb. Polşada yerləşən şirkətin uzun müddətdir üzərində çalışdığı Honey Badger adlı robot it yeni bir qabiliyyət əldə edərək su altında gəzməyə başlayıb. Paylaşılan videoda Honey Badger-in problemsiz şəkildə hovuzda su altında gəzdiyini görə bilərik. Videoda eşitdiyimiz suyun altında gəzinti səsləri isə bizə qorxu filmlərinin musiqilərini xatırladır.
Bu tərzdə olan sistemlər ümumiyyətlə sualtı üçün uyğun deyil, çünki onlar ayaq kimi strukturlardan istifadə edirlər. Bununla belə, videodan görünür ki, robot itlər daha əvvəl görülməmiş bir uğura imza atıblar. Honey Badger dörd ayağı olmasına baxmayaraq, heç bir problem olmadan su altında təhlükəsiz gəzə bilir. MAB-ın baş direktoru Jakup Bartoszek verdiyi açıqlamalarda, onların bu yeniliklərinin su basmış ərazilərdə yoxlama və texniki xidmət göstərməyə kömək edə biləcəyini bildirib. Beləliklə, Honey Badger gələcəkdə axtarış və xilasetmə səyləri üçün əhəmiyyətli rol oynaya bilər.
