Qualcomm şirkətinin Snapdragon X Elite və X Plus prosessorlarına malik yeni noutbukları M3 prosessorlu Macbook-lara qarşı effektivlik baxımından müqayisə edilərək sınaqdan keçirilib. Bildiyimiz kimi, bir çox kompüter istehsalçısı bu yaxınlarda Qualcomm-un yeni Snapdragon X Elite və X Plus prosessorlarını ehtiva edən noutbuklar təqdim ediblər. Yüksək batareya ömrü vəd edən Snapdragon X seriyalı prosessorları ilə təchiz edilmiş noutbuklar YouTube-da Alex Ziskind kanalında yeni MacBook modelləri ilə müqayisə edilib. Gəlin görək aparılan müqayisə nəticəsində hansı nəticələr əldə olunub?
![Snapdragon X M3](https://tedroid.com/media/2024/07/snapdragon-x-apple-m3-muqayise-1.webp)
Alex Ziskind-in YouTube-da batareyanın ömrü və səmərəliliyi testində Snapdragon çiplərinin real dünyada necə performans göstərdiyi barədə aydın təsəvvür əldə edə bilirik. Ziskind kodlaşdırma, YouTube videosu, musiqi dinləmək və cihazların real performansını simulyasiya etmək üçün bəzi tapşırıqları əhatə edən sınaqlar həyata keçirib. Effektivlik balı, əldə edilən batareya vaxtını batareyanın tutumu ilə mütənasibləşdirməklə əldə edilmişdir. Batareya istehlakını və görülən işi ölçən ilk səmərəlilik testində M3 MacBook Air ən səmərəli noutbuk olub. Daha sonra isə M2 MacBook Air və M3 Pro çipli MacBook Pro modelləri cəlbedici performans göstərib. Bir sözlə batareya tərəfində Apple M3 çipsetləri Snapdragon X çipsetlərini üstələyə bilib.
![Snapdragon X M3](https://tedroid.com/media/2024/07/snapdragon-x-apple-m3-muqayise.webp)
Digər tərəfdən, M3 prosessorlu Macbook, Surface Laptop 7, Asus Vivobook S 15, Dell XPS 13 və Galaxy Book 4 16 Edge kimi Snapdragon X Elite və X Plus ilə işləyən digər noutbukları üstələyib. Qeyd etmək lazımdır ki, bu effektivlik testi daha çox CPU nüvələrini həddindən artıq yoran intensiv tapşırıqlara diqqət yetirir. Daha real ssenari üçün Ziskind avtomatlaşdırılmış iş axını testini həyata keçirib. Bu test isə kodun yazılması və işlədilməsi və sonra YouTube videolarının oynadılmasından ibarət idi. Sınaq əsasən bütün notbukların yüksək performansda uzun müddət çalışması ilə bağlı idi. Ən yüksək effektivliyə Snapdragon X Plus prosessorlu Surface Laptop 7 modeli nail olub. Onun ardınca isə M3 Macbook Air modeli ikinci sırada yer alıb. Testlərdə, gözlənildiyi kimi, Intel prosessorlu kompüterlər səmərəlilik baxımından çox geridə qalıb.