Hal-hazırda smartfonlar arasında ən yaxşı görüntü işləmə qabiliyyətinə malik cihazlar Qualcomm Snapdragon çipsetindən öz güclərini alırlar. Çünki, Qualcomm şirkəti görüntü keyfiyyəti baxımından öz çipsetlərində çox güclü ISP və ya digər adı ilə görüntü emalı çiplərindən istifadə edir. Lakin buna baxmayaraq Qualcomm daim daha çox inkişaf etmək arzusundadır. MWC 2023 sərgisi çərçivəsində Qualcomm şirkəti Prophesee adlı foto sensor, görüntü texnologiyaları inkişaf etdirən şirkətlə əməkadaşlığına başladığını elan edir. Əməkdaşlıq çərçivəsində isə Qualcomm Snapdragon imzalı çipsetlər görüntü keyfiyyətini təkmilləşdirəcək Metavision adlı yenilik əldə etməlidirlər.
“Metavision” texnologiyalı smartfonlar necə işləyəcək?
Metavision texnologiyası, əslində bəlkə də ISP çiplərinin yerini əvəz edə bilər. Lakin ISP çipindən əlavə bir çip kimi quraşdırılması daha məqsədə uyğundur. Hal-hazırda smartfon bir görüntünü qeydə alarkən kamera sensorundan gələn görüntü birbaşa gəlib ISP (görüntü emalı çipindən) keçir. Lakin bu çip kamera sensorunun gördüyü və piksellər üzərində əks olunan işığın (görüntünün) bir növ proqram təminatı tərəfindən real-zamanlı idarə olunmasına imkan verəcək. Xüsusilə görüntüdə bir obyekt hərəkətdə olarkən, kamera sensorunda və daha doğrusu piksellərdə yaratdığı hərəkətlilik Metavision çipi ilə təyin ediləcək.
Nəticədə görüntü piksellər arasında dəyişərkən yaranan bulanıqlığın qarşısına keçiləcək. Lakin bu çipin işləməsi üçün fokus məsafəsinin sabit qalması və görüntülərin maksimum 12MP təsvir ölçüsündə qeydə alınması lazımdır. Ehtimallara görə Qualcomm şirkəti yaxın illərdə əmədakşlıq timsalında bu çipi bəzi çipsetlərində qarşımıza çıxara bilər. Dəqiq bir informasiya isə hələ ki, mövcud deyil.
