Oyun dünyasının ən məşhur konsollarından biri mübahisəsiz olaraq Xbox Series S konsolları hesab olunur. İndi Xbox Series S Toaster adlı yeni Xbox loqolu çörək qızartmağa imkan verən cihaz təqdim edilib və satışa çıxarılıb. Maraqlısı odur ki, yeni qızdırıcı aparat məhz Xbox Series S oyun konsolunun dizaynında hazırlanıb və oyun həvəskarlarının diqqətini cəlb edib. Artıq yeni toster ilə oyunla dolu bir günə başlamaq mümkün olacaq.
Oyun həvəskarları üçün indiyə qədər bir çox maraqlı cihazın hazırlandığının şahidi olmuşduq. Lakin ilk dəfə olaraq Xbox Series S Toaster adlı Xbox loqolu çörək qızarda bilən bir cihaz ortaya çıxıb. Ötən illərdə Xbox Series X konsolu dizaynında kiçik ölçülü soyuducu təqdim edən Microsoft, bu dəfə bir toster ilə yenidən gündəmə gəlib. Görünən odur ki, Microsoft oyun həvəskarlarını hər il fərqli cihazları ilə təəccübləndirməyə davam edir. Eyni anda iki çörək qızarda bilən cihazın 6 səviyyəli tənzimləməsi və LED sayğacı da mövcuddur.
Çörəyinizin üzərinə işlənəcək Xbox loqosunun nə dərəcədə yanmasını tənzimləmək mümkün olacaq. O cümlədən bu tosterin ötən il təqdim edilən mini soyuducu kimi böyük diqqət çəkəcəyi və tezliklə tükənəcəyi gözlənilir. Qeyd edək ki, Xbox Series S Toaster modeli hazırda 40 dollar başlanğıc qiymətinə sahib olsa da, ötən il təqdim edilən Xbox Series X mini soyuducusu 199 dollara satılırdı.
