Çin alimləri LK-99 materialında otaq temperaturunda superkeçirici əlamətlərini tapmaq cəhdlərindən əl çəkmir. Belə ki, Preprints arXiv.org saytı çinli alimlərin bədnam superkeçirici LK-99 materialı ilə apardıqları təcrübələr barədə maraqlı məlumatlarla dolu olan yeni məqalə dərc edib. LK-99-un nüsxəsi üzərində işləyən iki Çin laboratoriyası, materialın aşağı mühit temperaturunda, lakin normal atmosfer təzyiqində superkeçirici titrəmə əlamətləri göstərdiyini müşahidə edib. Məhz buna görə də LK-99 materialının superkeçirici olub-olmaması barədə maraqlı araşdırma başlayıb.
Alimlər tərəfindən kəşf edilən LK-99 materialının təxminən 20 °C otaq temperaturunda və normal atmosfer təzyiqində superkeçirici əlamətlərə sahib olması iddiası gündəm olub. Bu, enerji, sənayə və hətta tibb sahələrində əsaslı dəyişiklik etməyə səbəb ola bilər. Daha əvvəl koreyalı elm adamları bu materialla bağlı araşdırma aparıb və bütün diqqətləri öz üzərlərinə cəlb etmişdilər. Təəssüf ki, koreyalı alimlərin əldə etdiyi nəticəni başqa laboratoriyalarda təkrarlamaq mümkün olmayıb. Hətta onların apardığı araşdırma o qədər qeyri-müəyyən və qeyri-sabit olub ki, araşdırmaları elmi jurnaldan çıxarılıb və müəlliflər eksperimentlərin necə aparılacağını bilməməkdə və demək olar ki, savadsız olmaqda ittiham edilib.
Bununla belə çinli alimlər LK-99 materialı ilə bağlı araşdırmalarına davam edərək materialın iddia edilən xüsusiyyətlərinə əlavə olaraq təkrar istehsal oluna biləcəyini ortaya çıxardılar. O cümlədən materialın bəzi superkeçirici xüsusiyyətləri də -23 dərəcə temperaturda ortaya çıxır. Çin alimləri öz məqalələrində superkeçiricilik əlamətlərini göstərməkdə ehtiyatlı davranırlar. Çinli elm adamları apardıqları araşdırmanın Meysner effekti ilə əlaqəli olub-olmadığından belə hələlik əmin deyillər. Həmçinin materialın yalnız normal atmosfer təzyiqi altında superkeçirici əlamətlərə sahib olduğu da artıq dəqiqləşib. Elm adamları indi superkeçirici əlamətlərə sahib olduğu iddia edilən material ilə bağlı araşdırmalarını daha da dərinləşdirib.
