Dünyanın ən məşhur xəritə proqramı olan Google Maps indi Android, iOS və Android Auto-da naviqasiya zamanı 3D görünüş funksiyası əldə edir. Sadəcə bəzi istifadəçilər üçün əlçatan olan yeni funksiya hazırda sınaqdan keçirilir. Bildiyiniz kimi, Google Maps xidməti çox uzun müddətdir ki, bəzi bölgələrdə binaların 3D görüntüsünü dəstəkləyir. Lakin bu funksiya tətbiqin mobil versiyasında və avtomobillər üçün nəzərdə tutulan Android Auto-da əlçatan deyildi. İndi isə Google yeni ilə naviqasiya proqramında yenilik edərək başlayır.
İndi smartfon istifadəçiləri və Android Auto-dan istifadə edənlər Google Maps proqramında naviqasiya zamanı 3D görünüşə malik binaları və tikililəri müşahidə edə biləcək. Artıq bir çox istifadəçi bu funksiyadan istifadə etdiyini bildirir. Hətta onlar funksiyadan istifadə etmək üçün naviqasiyanı açmazdan əvvəl 3D görünüşü aktivləşdirmək və naviqasiya zamanı xəritəni bir az böyütmək lazım gəldiyini bildirirlər. Google Maps üçün tezliklə hərkəs üçün əlçatan olacaq yenilənmə ilə Timeline funksiyası çərçivəsində qeydə alınan həssas məkan məlumatları artıq buludda deyil, sadəcə smartfonların özündə saxlanacaq. iOS və Android proqramlarına göndəriləcək bu dəyişiklik məxfilik və təhlükəsizlik baxımından möhtəşəm imkan təklif edir.
Qeyd edək ki, Timeline funksiyası ziyarət etdiyiniz bütün ərazilərin və turistik yerlərin şifrəli qeydini saxlayır və onu Google serverlərinə göndərir. Şirkət həmçinin bildirir ki, məkan tarixçələri artıq 18 ay əvəzinə 3 aydan sonra avtomatik olaraq silinəcək. Bundan əlavə məşhur xəritə proqramında istifadəyə verilən 3D görünüş funksiyası istifadəçilərin daha rahat istifadəsi üçün binaları şəffaf olaraq göstərir. Hələlik yeniliyin nə zaman hərkəs üçün ümumi istifadəyə veriləcəyi məlum deyil.
