Hazırda elektromobil şirkətlərinin ən çox rəqabət apardığı mövzu onun nə qədər mənzilə sahib olması və nə qədər tez şarj olmasıdır. Bəzi şirkətlər isə bəzən bazarda üstünlüyü ələ almaq üçün şişirdilmiş məlumatlardan istifadə edir. Belə ki, saysız şikayətlərdən sonra məşhur Tesla brendi indi elektromobillərinin şişirdilmiş mənzil məlumatlarını azaldır. ABŞ-da satışa çıxarılan Model Y, Model S və Model X elektromobillərinin mənzil məlumatları artıq azaldılıb və müştərilərə təqdim edilib.
Qeyd edək ki, qısa müddət əvvələ qədər dünyada elektromobil satışlarında liderliyi əlində saxlayan Tesla ABŞ-da elektromobillərinin şişirdilmiş mənzil məlumatlarını azaltmaq məcburiyyətində qalıb. Hətta ümumilikdə elektromobil nəhəngi mənzil məlumatlarını 6% azaldıb. Nəhayət ABŞ ədliyyə departamentinin şişirdilmiş mənzil məlumatları ilə bağlı apardığı araşdırma nəticəsində avtomobil nəhəngi məlumatları yeniləyib. Maraqlısı budur ki, Tesla bu addımı səssiz həyata keçirib və bu barədə əlavə məlumat vermək istəməyib.
İndi ABŞ-da yaşayan müştərilər üçün nəzərdə tutulan Tesla veb saytında Model Y Performans elektromobilinin mənzili 303 mil-dən 285 milə qədər azaldılıb. O cümlədən Model Y Long Range elektromobilinin əvvəlki 330 mil göstəricisi indi 310 milə enib. Model X Plaid elektromobili üçün isə bu göstərici 333 mildən 326 milə qədər enib. Qeyd edək ki, məlumat yeniliyi sadəcə ABŞ-dan olan müştərilər üçün həyata keçirilib. Belə ki, Böyük Britaniya, Avropa birliyi və digər regionlar üçün nəzərdə tutulan Model 3, Cybertruck modellərində mənzil məlumatları hələ də eyni olaraq qalır.
