İnsayderlər Samsung şirkətinin məlumat bazasında Galaxy Z Fold smartfon modellərinə oxşayan qatlana bilən dizayna malik noutbukun dizayn sənədlərini aşkar ediblər. Belə ki, onlar bu dizaynın Samsung brendinin yeni noutbuk modelinə aid patent sənədləri olduğunu bildiriblər. Qeyd edək ki, şirkət sonuncu dəfə qatlana bilən Galaxy Z Fold 4 smartfonunu təqdim etmişdi. İnsayderlər aşkar etdikləri patentin brendin gələcəkdə təqdim edəcəyi noutbuk modelinə aid olduğunu bildirirlər.
Samsung brendinin yeni noutbuk modeli hansı xüsusiyyətlərə sahib olacaq?
İnsayderlərin aşkar etdiyi patent sənədlərində sadəcə qatlana bilən ekranlardan ibarət yeni noutbuk modelinin adı Galaxy Book Fold 17 olaraq qeyd edilib. Həmçinin yeni noutbuk modelini brendin OLED ekranlar ilə bağlı çəkdiyi reklam videosunda görmək mümkündür. Qeyd edək ki, ötən günlərdə Apple şirkəti noutbuklarla bağlı patent almışdı. Bu, noutbukların düyməsiz klaviatura dizaynına malik olması ilə bağlı idi.
İnsayderlərin aşkar etdiyi patent sənədlərinə görə Samsung brendinin yeni noutbuk modeli qatlana bilən ekran panelləri ilə yanaşı sensorlu klaviatura ilə də təchiz olunacaq. Bu klaviatura vasitəsi ilə isə istifadəçilər xüsusi tətbiqlərdə rahat çalışa biləcəklər. Belə ki, istifadəçilər bu klaviaturanı video redaktə edərkən və ya musiqi yaradarkən alətlər panelinə çevirə biləcəklər.
Həmçinin patentin eskizləri göstərir ki, ekranın aşağı hisəsində və ya sensorlu klaviaturanın yan hissəsində sensorlu trackpad üçün nəzərdə tutulmuş ayrıca sahə mövcuddur. Hələlik öz təsdiqini tapmasa da brendin yeni noutbuk modelinin təqdimatı yanvar ayında Las Veqasda baş tutacaq CES 2023 sərgisində sərgiləməsi gözlənilir.
