Samsung-un yeni flaqman smartfonu olan Galaxy S25 Edge rəsmi olaraq təqdim edilməmişdən əvvəl qiyməti şirkətin öz saytında paylaşılıb. Kanadada keçirilən təqdimat kampaniyasının şərtlər və bölməsində görünən bu məlumat cihazın qiyməti ilə bağlı ilk konkret məlumatları ortaya çıxarıb.
Kanadada başladılan kampaniya çərçivəsində Samsung şirkəti Galaxy S25 seriyasına və ya müəyyən məişət texnikasına sahib olan istifadəçilərə Galaxy Tab S10 FE planşetinə 20% endirim təklif edir. Bununla belə, təqdimat səhifəsindəki məhsul siyahısı təkcə kampaniyanın əhatə etdiyi cihazları deyil, həm də Galaxy S25 Edge-in qiymətlərini ortaya qoyub. Siyahıya əsasən, Galaxy S25 Edge-in 256GB versiyası 1678,99 Kanada dolları, 512GB modeli isə 1858 Kanada dolları dəyərindədir. Bu rəqəmlər müvafiq olaraq təxminən 1200 və 1340 ABŞ dollarına uyğun gəlir. Həmin gün dərc edilən başqa bir hesabatda cihazın Cənubi Koreya qiymətləri də paylaşılıb. Buna görə Koreyada 256 GB-lıq modelin təxminən 1049 dollara, 512 GB-lıq modelin isə təxminən 1140 dollara satılacağı bildirilir. Bu fərqi isə vergi siyasəti və ölkələr arasında məzənnə fərqləri ilə izah etmək olar
Galaxy S25 Edge-in təqdimat tarixi də dəqiqləşib. Bildirilir ki, şirkət mayın 13-də keçiriləcək xüsusi tədbirdə cihazı təqdim edəcək.Daha sonra ilkin sifariş prosesi başlayacaq. Digər tərəfdən cihazın mayın 23-də Cənubi Koreyada, mayın 30-da isə ABŞ bazarında rəflərə çıxması gözlənilir. Azərbaycan bazarı ilə bağlı hələlik məlumat mövcud deyil, adətən bu qeyd edilən tarixlərdən 1 həftə sonra ölkəmizdə də smartfonlar rəsmi olaraq satışa çıxarılır. Samsung-un qiymət siyasəti S25 Edge-nin yerini daha da aydınlaşdırır: Bu cihaz aydın şəkildə premium seqmentə yönəlib. Daha əvvəl sızan məlumata görə, texniki xüsusiyyətləri də bunu dəstəkləyir. Belə ki, Snapdragon 8 Elite prosessoru, 12 GB RAM və 4.000 mAh batareya tutumu ilə gəldiyi deyilən çox nazik S25 Edge, kamera tərəfindəki 12 MP + 200 MP cüt sensorlu quruluşu ilə diqqət çəkir.
